भांगरभूंय | प्रतिनिधी
पालसणां कोसळ्ळी, घरांनी उदक घुसलें, जनसंपर्क तुटलो
भांगरभूंय । प्रतिनिधी
फोंडें, पेडणें, दिवचलः आयतारा सकाळच्यान पडपी उटंगराच्या पावसाक लागून गोंयांतल्या खूबश्या वाठारांतले रस्ते उदका पोंदा गेले, पालसणां कोसळ्ळीं, झाडां पडलीं.
कोने- प्रियोळ वाठारांत पालसण कोसळिल्ल्यान फोंडें ते म्हाड्डोळ मेरेनच्या राष्ट्रीय म्हामार्गार सुमार 3 वरां येरादारी बंद उरली. तशेंच म्हाड्डोळच्या पंचायत कार्यालया कडल्यान कांय अंतराचेर आशिल्ल्या दोन घरांनी गटार चोंदिल्ल्यान दोन घरांनी उदक घुसलें. म्हाळशी- कुर्टी रस्त्याचेर पालसण कोसळपाचीय घडणूक घडली.
कोनेच्या राष्ट्रीय म्हामार्गार पालसण कोसळिल्ल्याची खबर येरादारी पुलिशेक मेळटाच पुलिसांनी येवन फर्मागुडये वयल्लया गोंय अभियांत्रिकी म्हाविद्यालया कडल्यान येरादारी घुंवडायली. ताका लागून येरादारीचेर चड परिणाम जालो ना. ते उपरांत उजो पालोवपी दळ, म्हाड्डोळ पुलीस स्टेशनाचे निरिक्षक योगेश सावंत तशेंच भौशीत बांदकाम खात्याच्या अभियंत्यांनी धांव घेवन जेसीबीच्या आदारान पालसणाची माती, फातर कुशीक काडले. सुमार 3 वरां उपरांत ह्या मार्गा वयल्यान येरादारी परतून चालू जाली.
म्हाळशी- कुर्टीच्या बायपास रस्त्याचेर सकाळीं 10 वरांच्या सुमाराक पालसण कोसळ्ळें. येरादारी पुलिसांनी जेसीबीच्या आदारान पालसणाचे माती, फातर कुशीक काडली आनी येरादारी सुरळीत जावचे खातीर रस्तो मेकळो करून दिलो. उटंगराच्या पावसाक लागून आनीक कांय पालसणां कोसळपाचे स्थितींत आसात.
केरये- खांडेपारच्या चर्ची मुखा वयल्या रस्त्या वयले गटार चोंदिल्ल्यान रस्त्याचेर उदक सांचलें. ताका लागून फोंडेंच्या खांडेपारचे दिशेन वचपी येरादारीक आडखळ निर्माण जाली.
म्हाड्डोळच्या पंचायत कार्यालया कडल्यान कांय अंतराचेर आशिल्ल्या गुरुदास म्हाड्डोळकार आनी श्यामकांत आकारकार हांच्या घरांत उदक घुसलें. सकाळीं घरांत घुशिल्लें उदक दनपारां गटार नितळ करिमेरेन घरांतूच सांचून उरिल्ल्यान दोनूय घरधनयांक लाखांनी रुपयांचें लुकसाण जालें.
नागझर- कुर्टीच्या व्हाळांतल्या उदकाची पातळी वाडिल्ल्यान महादेव मंदिरांत उदक घुसलें. दर वर्सां पावसाळ्यांत ह्या देवळांत व्हाळाचें उदक घुसता.
कासरवर्ण्यां जनसंपर्क तुटलो
पेडणें म्हालांत व्हड प्रमाणांत पडपी उटंगराच्या पावसाक लागून खूब कडेन पडझड जाली. तशेंच मोपा विमानतळा वयलें उदक थेट गांवांत घुसता. न्हंयांक लेगीत हुंवार आयला. उदक व्हावून वचपा खातीर जे व्हाळ, पोयों आसात, त्यो लेगीत उपाट भरून व्हावतात. खूबश्या वाठारांतले रस्ते उदका पोंदा गेल्ल्यान ह्या रस्त्या वयल्यान गाडी चलोवप लेगीत कठीण जालां. लोकजीण विस्कळीत जावपा वांगडाच जनसंपर्क लेगीत तुटला, टेलिफोन सेवा बंद पडल्या.
मोपा दोंगरार बांदिल्ल्या विमानतळा वयल्या उदकाक वचपाक वाट नाशिल्ल्यान तें मेळत ते वटेच्यान घुसता. ताका लागून पुराय वाठारांत न्हंयांचें रूप आयलां. खूब कडेन हुंवारा सारकी परिस्थिती निर्माण जाल्या. वारखंड, निगळे, नागझर, कासारवर्णे चांदेल ह्या वाठारांनी ही स्थिती चडूच भिरांकूळ जाल्या. साबार वाठारांनी झाडां हुमटून पडल्यात. कांय झाडां वीज सरयांचेर पडिल्ल्यान वीज पुरवण खंडीत जाल्या.
पेडणें म्हालांतल्या राष्ट्रीय म्हामार्ग धरून भायल्या- भितरल्या सगळ्याच रस्त्या कुशीक आशिल्ली गटार वेवस्था पेड्डेर जाल्ल्यान पावसाचें सगळें उदक रस्त्या वयल्यान व्हांवता. नागझर कासारवर्णे वाठारांत हुंवारा सारकी परिस्थिती निर्माण जाल्या.
दिवचलच्या सगळ्या न्हंयांक हुंवार
शेनवारा रातच्यान सुरू जाल्लो उटंगराचो पावस आयतारा दनपार मेरेन चालूच आशिल्लो. अस्नोडेंची पार न्हंय, दिवचलची न्हंय, सांखळेची व्हाळवाट न्हंय तशेंच शापोरा न्हंयेन धोक्याची पातळी हुपल्या. सगळेच व्हाळ, व्हाळुल्यो उपाट भरून व्हांवतात. खूबश्या वाठारांनी तशेंच रस्त्याचेर उदक भरिल्ल्यान येरादारीचेर परिणाम जालो. लाखेरे, पिळगांव, न्हावेली, भटवाडी ह्या वाठारांत घरांनी उदक घुशिल्ल्यान लोकांची धांदळ जाली. आपात्कालीन नियंत्रण कक्ष, दिवचल उजो पालोवपी दळ तशेंच शिंपणावळ खातें स्थितीचेर नदर दवरून आसा.
सांखळेच्या व्हाळवाट न्हंयेक हुंवार आयिल्ल्यान बाजारपेठेंत उदक घुसचें न्हय हे खातीर शिंपणावळ खात्यान सगळे पंप चालू करून उपाट भरिल्ल्या व्हाळांतलें उदक ओडून व्हाळवाट न्हंयेंत सोडपाचें काम फांतोडेंच्यान चालू दवरलां.
मुळगांव, सांखळी, न्हावेली, पिळगांव, नानोडें वाठारांतल्या कांय रस्त्यांचेर उदक सांचिल्ल्यान येरादारीचेर परिणाम जालो. साळांतल्या तशेंच पिळगांवच्या कांय घरांनी उदक घुसलें.
मुख्यमंत्र्यान घेतलो नियाळ
मुख्यमंत्री डॉ. प्रमोद सावंत हांणी म्हालांतल्या तशेंच गोंयभरांतल्या पावसाचो तशेंच हुंवार स्थितीचो नियाळ घेतलो. जिल्होधिकारी तशेंच म्हाल पांवड्या वयले अधिकारी, मामलेदार, आपत्कालीन नियंत्रण कक्ष हांकां सतर्क रावपाचे आदेश दिल्या. तत्काळ मजत दिवचे खातीर सगळे तरेची उपाय येवजण करात, अशें मुख्यमंत्र्यान निर्देश दिल्यात.
शिंपणावळ खात्याचे अधिकारी के. पी. नायक, विनोद भंडारी, निलेश पोकळे आनी तांचे पंगड सगळे स्थितीचेर नदर दवरून आसात.
दिवचलचे आमदार डॉ. चंद्रकांत शेट्ये आनी मयेंचे आमदार प्रेमेंद्र शेट्ये हांणी उजो पालोवपी दळ तशेंच अधिकाऱ्यां कडेन संपर्क करून सगळे तरेची मजत करपाची सुचोवणी केल्या.
सांखळेची नगराध्यक्ष रश्मी देसाय हांणी सांगलें, आमी स्थितीचेर नियंत्रण दवरून आसात. परिस्थिती नियंत्रणांत आसा. शिंपणावळ खात्याचे अधिकारी सेगीत उदकाचे पातळीचेर नदर दवरून आसात. पंपींग चालूच दवरिल्ल्यान बाजारपेठेंत उदक येवपाचो धोको ना, अशेंय तांणी स्पश्ट केलें.
मोपा विमानतळार उदकूच उदक
मोपाच्या मनोहर आंतरराष्ट्रीय विमानतळाचेर व्हड प्रमाणांत पावसाचें उदक घुसलां. टॅक्सी कावंटराचे विभाग आसात थंय व्हड प्रमाणांत थेट पावसाचें उदक पांख्यांतल्यान भितर घुशिल्ल्याचें चित्र दिसता. विमानतळा वयले नितळसाण कामगार एकसारके हे उदक भायर उडोवपाच्या कामांत व्यस्त आशिल्ल्याचेंय दिसता.
तिळारी कानाल उपाय भरल्यात
पेडणें म्हालांतल्या शेतकारंक आदार करचे खातीर सरकारान बांदिल्ले तिराळी कानाल खूब कडेन उपाट भरून व्हांवतात. गिमाच्या दिसांनी चडशे आटिल्ले आशिल्ले हे कानाल सध्या उपाट भरल्यात. कांय वाठारांनी जाल्यार ह्या कानालाचें उदक बागायती, शेतां- भाटांनी घुसलां.
कळणें न्हंयेक हुंवार
चांदेल वाठारांतली कळणें न्हंय महाराष्ट्र सिंधुदुर्ग वाठारांतल्यान व्हांवत, पेडणें म्हालांत येता. ते न्हंयेक हुंवार आयिल्ल्यान चांदेल, हसापूर, कासारवर्णे, कळणे वाठारांतले खूबशे रस्ते उदका पोंदा गेल्ल्यान आलतडच्यान पलतडी वचपाक आडखळी येतात. जनसंपर्क तुटला. कळणें न्हय उपाट भरिल्ल्यान तें उदक मेळत थंयच्यान वाट काडून पेडणें म्हालांत पावलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
