भांगरभूंय | प्रतिनिधी
उटंगाराच्या पावसान गोंयभर खवदळ
पणजी, प्रतिनिधी: गोंयात आयज उटांगाराच्या पावसान खवदळ घालो. सकाळीं सुरू जाल्लो पावस सांजवेळा ४ मेरेन पडटालो. हे फाटभुंयेंर हवामान खात्यान आयज रेड अलर्ट जारी केला आनी फांल्या आॅरेंज अलर्ट. आयज बरोच व्हडलो घोंग्याचो पावस पडलो. पावसा बरोबर वरांक 40 ते 50 किलोमिटर वेगान वारें मारतालें, अशी म्हायती हवामान खात्यान दिल्या.
पयलीं सकाळीं हवामान खात्यान आॅरेंज अलर्ट जारी केल्लो. पुण पावसाचो वाडतो नेट पळोवन तांणी दनपारां रेड अलर्ट जारी केलो. फुडले 3 वरां भितर उत्तर आनी दक्षीण गोंयच्या वाठारांनी मघ्यम ते मोठो पावस झडपाची शक्यताय तांणी उक्तायल्या. पावसा बरोबर 40 ते 50 किलोमिटर नेटान वारें व्हांवतलें. जाल्यार फाल्यां उत्तर आनी दक्षीण गोंयांत पावसाचो नेट मात्सो उणो जावन उटांगराचो पावस चालूच उरतलो आनी नेटाचें वारेंय मारतलें देखून फाल्यांय आॅरेंज अलर्ट हवामान खात्यान कायम दवरला.
जाल्यार 9 ते 11 जुलया मेरेन हवामान खात्यान येलो अलर्ट जारी केला. ह्या दिसांनी उत्तर आनी दक्षीण गोंयच्या काय वाठारांनी मोठो पावस कोसळपाची शक्यताय आसा आनी पावसा बरोबर वारेंय व्हांवतलें, असो अदमास हवामान खात्यान उक्तायला.
आयज पडिल्ल्या उटांगाराच्या पावसाक लागून सकयल्या सुवातींनी हुंवार आयले. ते भायर चडशे सुवातांनी रस्तेय लेगीत उदका पोंदा गेले. काय वाठारांनी झाडा पडली जर काय वाठारांनी पालसण कोसळपाच्यो घडणुको घडल्यो.
पोरण्यां गोंयां स इंच पावस
फाटल्या साडे स वरांनी पोरण्यां गोंयांत ६.३५ इंच पावस पडला. तर पणजे ४.५० इंच पावस. मुरगांव २.२० इंच तर म्हापश्यां १ इंच पावस पडला.
व्हाळवाट न्हंयेच्या उदकाची पातळी वाडिल्ल्यान घोटेली- केरीचो पूल उदका पोंदा गेलो. केप्यां- पाड्ड्यांय पूल उदका पोंदा गेला. होंडाच्या नागरी पुरवण खात्याच्या गुदावाचे पत्रे उडून गेल्यात. ताका लागून धान्य भिजपाची भिरांत थळाव्यांनी उक्तायल्या. पाली- सत्तरींत घसघश्याचेर कांय अतिउत्साही तरणाटे न्हावपाक गेल्ले. उदक वाडिल्ल्यान तातूंतले २० जाण आडकून उरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
