भांगरभूंय | प्रतिनिधी
मुखेली सिकंदर रझाच्या अश्टतासांच्या खेळा नेटार येजमान झिम्बाब्वे पंगडान काल जाल्ले पयले टी-20 मॅचींत भारताक 13 धांवड्यांनी हारोवन इतिहासीक जैत नोंदयलें.
बॅटिंगेक कठीण अशे खेळपट्टीचेर 116 धांवड्यांचे ल्हान मोखीचो फाटलाव करपी भारताची बॅटींग अपेशी थारली. झिम्बाब्वेचे बॉलिंगे मुखार भारताच्या बॅट्समनांनी दिमी मारली, ताका लागून भारताचो डाव 19.2 ओव्हरींनी 102चेर सोंपलो.
भारता वतीन मुखेली शुभमन गिलान 29 बॉलांनी पांच चवक्यांचे मजतीन सगल्यांत चड 31 धांवड्यो केल्यो. 11वे ओव्हरींत सिंकदर रझान ताका बोल्ड केलो आनी मॅच झिम्बाब्वे वटेन घुंवली. ते उपरांत वॉशिंग्टन सुंदर आनी आवेश खान हांणी भारताक परतून मॅचींत हाडपाचो यत्न केलो. आवेश खानान 12 बॉलांनी तीन चवक्यांचे मजतीन 16 धांवड्यो केल्यो. वॉशिंग्टन सुंदरान एक चवको आनी एक सक्याचे मजतीन 27 धांवड्यो केल्यो. भारताच्या आठ बॅट्समनांक दोट्टी आंकडो लेगीत हुपपाक जमलो ना. आंतरराष्ट्रीय टी-20 क्रिकेटींत झिम्बाब्वेन तिसरे खेपे भारताक हारयलो.
झिम्बाब्वे वतीन सिकंदर रझा आनी टेंडई चतारा हाणें दरेकी तीन विकेटी घेतल्यो. ब्रायन बेनेट, वॅलिंग्टन मसाकाद्झा ब्लेसिंग मुजाराबानी आनी ल्यूक जॉन्गवे हाणें एकेक विकेट मेळयली.
ते पयलीं टॉस हारल्या उपरांत पयलीं बॅटींग झिम्बाब्वेची सुरवात बरी जाली ना. दुसरे ओव्हरींत मुकेश कुमारान इनोसेंट काईया (0) हाका बोल्ड करून भारताक पयलें येस मेळोवन दिलें. ते उपरांत वॅस्ले मधेविरे आनी ब्रायन बेनेट हांणी दुसरे विकेटी खातीर 34 धांवड्यांची भागिदारी केली. सवे ओव्हरींत रवी बिश्नोईन बेनेटाक (22) बोल्ड करून झिम्बाब्वेक दुसरो धपको दिलो. बिश्नोईन आठवे ओव्हरींत वॅस्ले मधेविरे (18) हाका बोल्ड करून आपली दुसरी विकेट घेतली.
मुखेली सिकंदर रझान 17, डिओन मेयर्सान 23 धांवड्यो केल्यो. क्लायव्ह मडांडेन 25 बॉलांनी 29 धांवड्यो केल्यो. पांच बॅट्समनांक खातें लेगीत उगडपाक जमलें ना. बिश्नोई आनी सुंदर हांचे बॉलिंगे मुखार झिम्बाब्वेक 20 ओव्हरींनी 115 धांवड्यो करप शक्य जाल्यो.
बिश्नोईन 12 धांवड्यो दिवन 4, सुंदरान 11 धांवड्यो दिवन दोन आनी मुकेश आनी आवेश खान हाणें एकेक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
