भांगरभूंय | प्रतिनिधी
म्हापशें, प्रतिनिधी ः कळंगूटे आनी म्हापशें मोबायल चोरपाच्या प्रकरणांत पुलिसांनी तीन जाणांक अटक करुन तांचे कडल्यान चोरिल्ले दोन मोबायल फोन जप्त केल्यात. अटक केल्ल्या दुबाविता तातूंत मोहम्मद इस्माईल शेख (बिहार), सावन बाळू राठोड (कर्नाटक) आनी मोमिनुल मुल्ला (पर्रा, मूळ अस्तंत बंगाल) हांचो आस्पाव आसा.
मोबायल फोन चोरपाची घडणूक शुक्रारा 5 तारखेक सांजवेळा घडली. कागाळदार मुझावर उल्ला (दावणगिरी कर्नाटक) आपल्या इश्टां सयत रस्त्या वयल्यान चलत वतना दोन अनवळखी दुचाकी चलोवप्यांनी ताचो हांतातलो मोबायल घेवन पळ काडिल्लो.
कळंगूटे पुलिशेंत कागाळ केल्या उपरांत पुलिसांनी रोखडीच कारवाय करून मोहम्मद शेख आनी सावन राठोड ह्या दोगूय दुबावीतांक अटक करून मोबायल फोन जप्त केलो. दुबावितां आड गुन्यांव नोंद केला. निरिक्षक परेश नायक हांच्या फुडारपणा खाला हवालदार विशाल गावास फुडली चवकशी करतात.
म्हापशेंच्या मार्केट सबयार्डांत बिरेस्तारा सांजवेळा चार वरांचे सुमाराक चोरीची दुसरी घडणूक घडली. कागाळदार सचिन राठोड हाचो सोयरो अम्रेश चव्हाण मार्केट सबयार्डांतल्या फळांच्या दुकानांत न्हिदिल्लो. ही संद घेवन दुबावितान दुकानांतलो मोबायल चोरलो आनी पळ काडलो.
ही चोरी दुकानाच्या सीसीटीव्हींत कैद जाल्या. पर्राच्या कांय थळाव्यांच्या मजतीन म्हापशें पुलिसांनी दुबावीत मोमिनुल मुल्लाक धरलो आनी चोरिल्लो मोबायल जप्त केलो. दुबाविताचेर गुन्यांव नोंद केला. निरिक्षक निखिल पालेकार हांच्या फुडारपणा खाला पुलीस फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
