विद्यार्थ्यांनी धावें उपरांत स्पर्धात्मक परिक्षेची तयारी सुरू करची : मुख्यमंत्री

भांगरभूंय | प्रतिनिधी

व्हर्च्युअल पद्दतीन राज्यभरांतल्या 60 हजार विद्यार्थ्यां कडेन सादलो संवाद

पणजी ः राज्य सेवा वा भौशीक सेवा आयोग अशा स्पर्धात्मक परिक्षेची तयारी राज्यांतल्या विद्यार्थ्यांनी धावें उपरांत करची असो उलो मुख्यमंत्री डॉ. प्रमोद सावंत हांणी केलो. शेनवारा श्रीमती हायस्कूल, वेळगेच्यान तांणी व्हर्च्युअल पद्दतीन राज्यभरांतल्या यत्ता 8 ते 10 वी वर्गांतल्या 60 हजार विद्यार्थ्यां कडेन संवाद सादलो. ह्या कार्यावळीत डॉ. महादेव गांवस हांणी करियर मार्गदर्शन केलें. जाल्यार पुलीस अधीक्षक राहुल गुप्ता हांणी सायबर गुन्यांवांची म्हायती दिली.
हेर राज्यां प्रमाण गोंयान स्पर्धात्मक परिक्षे खातीर गरजेची संस्कृताय निर्माण करची. हे खातीर उच्च शिक्षण पांवड्यार यत्न करचे पडटले. स्पर्धात्मक परिक्षा विद्यार्थ्यां खातीर एक बरो करिअर पर्याय जावंक शकता. हे खातीर 10 वी उपरांतच तयारी सुरू करची. तुमकां करिअरा विशीं कसलोय दुबाव आसल्यार तुमच्या शिक्षकाक विचारात. गांवगिऱ्या वाठारांतल्या शिक्षकांनी विद्यार्थ्यांची प्रवृत्ती पळोवन तांच्या करियरा संबंदी तांका मार्गदर्शन करचें अशेंय मुख्यमंत्र्यान सांगलें.
तांणी सांगलें, दर वर्सा आमी पळयतात 90 ते 92 टक्के धावेंचो निकाल लागता. पूण शिक्षक आनी विद्यार्थी खासा यत्न केल्यार हो निकाल शंबर टक्के लागूंक शकता. राज्यांतल्या 12 आयटीआयंत 14 ते 15 प्रकारचे अभ्यासक्रम आसात. हीं वेगवेगळ्या कुशळटाय उदरगती खातीर फायदेशीर थारूंक शकतात. आयटीआय पुराय करून कांय विद्यार्थी येसस्वी उद्देजक जाल्यात. देखून आयटीआयक कमी मानूंक फावना. 15 जुलय सावन सुरू जावपी हॉस्पिटॅलिटी अभ्यासक्रमांतल्यान विद्यार्थ्यांक फायदो जातलो.
विद्यार्थ्यांनी गरज पडटा तेन्नाच स्मार्ट फोन वापरचे. सोशल मिडियाचेर इश्टागत करतना जतनाय घेवप गरजेचें. अनवळखी मनशांचो फ्रेंड रिक्वेस्ट स्वीकारूं नाकात. गेमींग, सोशल मिडिया वा हेर खंयच्याय ऑनलायन माध्यमांतल्यान सायबर फटवणूक जावची न्हय हाची जतनाय घेयात. स्पर्धात्मक परिक्षा दिवपाची आसल्यार मोबायलाचो उणोच वापर करप गरजेचें आसा अशें सायबर गुन्यांव फांट्याचे पुलीस अधीक्षक राहुल गुप्ता हांणी सांगलें.