भांगरभूंय | प्रतिनिधी
नवी दिल्ली, खबरां संस्था ः वाणिज्य आनी उद्देग मंत्रालयाच्या खाला आशिल्ल्या ‘उद्देग आनी अंतर्गत वेपाराच्या प्रसार विभागान’ (DPIIT) रांदचे कुडींतल्या स्टेनलेस स्टील आनी ॲल्युमिनियम आयदनांक राष्ट्रीय दर्ज्याच्या मानकां प्रमाण आसप सक्तीचें केलां. म्हणल्यार आतां ह्या आयदनांचेर आयएसआयचें (ISI) हॉलमार्क आसप सक्तीचें केलां. गिरायक सुरक्षीतताय आनी उत्पादनाची गुणवत्ता सुनिश्चीत करपा खातीर हें पावल उबारलां. भारतीय मानक ब्युरोन ही म्हायती दिल्या.
बीआयएसाच्या आदेशा प्रमाण, बीआयएस मानक चिन्न नाशिल्ल्या खंयच्याय स्टेनलेस स्टील वा ॲल्युमिनियम आयदनांचें उत्पादन, आयात, विक्री, वितरण, सांठो वा प्रदर्शनाचेर बंदी आसा. ह्या आदेशाचें पालन करूंक ना जाल्यार दंड भरचो पडटलो अशेंय आदेशांत म्हणलां.
हें बीआयएस हालींच्या व्यापक मानकां प्रमाण रांदचे कुडीच्या आयदनां खातीर तयार केल्या. तातूंत स्टेनलेस स्टील खातीर IS 14756:2022 आनी ॲल्युमिनियम आयदनां खातीर IS 1660:2024 हांचो आस्पाव आसा.
मानकांत सामानाची गरज, डिझायन खाशेलपण आनी कार्यक्षमताय मापदंड हांचो आस्पाव जाता. हे कृतीक लागून गिरायकांचो आत्मविस्वास वाडटलो आनी उत्पादकांक उत्तम पद्दती आपणावंक प्रोत्साहन मेळटलें अशें सरकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
