भांगरभूंय | प्रतिनिधी
नवी दिल्ली, खबरां संस्था ः भारत आनी रशिया हांच्या संयुक्त उपक्रमांतल्या इंडो-रशियन रायफल्स प्रायव्हेट लिमिटेड (IRRPL) कंपनीन भारतीय सैन्याक 35 हजार एके-203 असॉल्ट रायफल्स दिल्यात. मेक इन इंडिया आनी आत्मनिर्भर भारता खाला 2021 वर्सा तांचें उत्पादन सुरू जाल्लें. हे रायफलाचें खाशेलपण म्हळ्यार ती 1 मिनटांत 700 राउंड फायर शकता, तशेंच वजनांत हलकी आसा आनी केन्नाच जाम जायना.
भारतांत एके-203 कलाश्निकोव्ह असॉल्ट रायफल तयार करपाच्या प्रकल्पाचो पयलो पांवडो आयआरआरपीएलान पुराय केला. हाचे वांगडा भारत हो एके-203 सिरिज असॉल्ट रायफल तयार करपी पयलो देश थारलो. लश्कर तशेंच भारताच्या सुरक्षा दळांत लेगीत एके-203 असॉल्ट रायफल्स आसतल्यो. हाचे भायर आयआरआरपीएल ही रायफल हेर देशांनीय निर्यात करूंक शकता.
AK-203 हें INSAS परस वेगळें
भारतीय सैन्य 1996 सावन INSAS रायफल वापरता. सद्या तिनूय सैन्यांत सुमार 7 ते 8 लाख INSAS (Indian Small Arms System) आसात. INSAS चें तुळेंत ही रायफल ल्हान, हलकी आनी चड घातक आसात. AK-203 चें वजन 3.8 किलो. जाल्यार INSAS रायफलाचें वजन मॅगझिन आनी संगीन नासतना 4.15 किलो आसा. INSAS ची लांबाय 960 मिमी, जाल्यार AK-203 ची लांबाय 705 मिमी आसा. विशेश म्हळ्यार चड थंडाय, उश्णताय आनी पावसाचो लेगीत AK-203 चेर परिणाम जायना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
