भांगरभूंय | प्रतिनिधी
हैदराबाद, खबरां संस्था ः तेलंगणाच्या मंचेरियलांतल्या पोनाक्कलच्या मुळाव्या शाळेंतल्या एका शिक्षकाची बदली जाली, पूण तांच्या विद्यार्थ्यांक तें आवडलें ना. देखून 133 विद्यार्थ्यांनी ती शाळा सोडली आनी सगळ्यांनी अक्कापल्ली गुडाच्या शाळेंत प्रवेश घेतलो जंय तांच्या शिक्षकाची बदली जाल्ली.
ह्या भुरग्यांचो आवडीचो शिक्षक म्हळ्यार जजला श्रीनिवास. 2012 वर्सा सावन ते पोनाक्कल मुळाव्या शाळेंत शिकयताले. श्रीनिवास हांची बदली 1 जुलयाक जाली. 30 जून दिसा अक्कापेल्ली शाळेंत फकत 21 विद्यार्थी आशिल्ले. आतां तांचो आंकडो वाडून 154 जाला. पूण हांगा श्रीनिवास हे एकलेच शिक्षक आसात.
श्रीनिवास 12 वर्सां आदीं आयिल्ले
जजला श्रीनिवास जुलय 2012 त ह्या जन्नाराम मंडळाच्या शाळेंत आयल्ले. त्या वेळार फकत 5 वर्ग, 2 शिक्षक आनी फकत 32 विद्यार्थी आशिल्ले. श्रीनिवास हांची खेळांतल्यान शिकोवपाची पद्दतीक लागून लोकांनी आपल्या भुरग्यांक सरकारी शाळेंत धाडपाचें थारायलें. 133 भुरग्यांनी शाळा सोडचे पयलीं हांगा 250 भुरगीं आशिल्लीं. तिझीपल्ली, गोडगुडा, कमनपल्ली, किश्तपूर, इंदनपल्ली, गांधीनगर, जुविगुडा आनी जन्नाराम गांवांतले विद्यार्थी ऑटोन शाळेंत वतात. ही शाळा तांच्या आदल्या शाळे पसून 3 किमी अंतराचेर आसा.
ह्या शाळेच्या भुरग्यां खातीर जजला हांणी खूब मेहनत घेतली. तांणी आपल्या हेर शिक्षकां वांगडा उत्कृश्ट निकाल मेळयलो. फाटलीं पांच वर्सां जून म्हयन्याच्या निमाणे शाळे भायर ‘नो एडमिशन’ बोर्ड लायिल्ले. मंडळांतल्या सुमार 10 गांवांतल्यान भुरगीं हांगा अभ्यासा खातीर येतालीं. हे शाळेंतल्यान खूबश्या विद्यार्थ्यांची गुरूकुल आनी नवोदय परिक्षेंत निवड जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
