भांगरभूंय | प्रतिनिधी
काणकोण: बलराम उच्च माध्यमीक विद्यालय अर्धफोंड काणकोणां शणै गोंयबाब तशेंच महाराष्ट्रांतले साहित्यीक पांडुरंग सदाशीव साने हांच्या उगडासाक आंतर वर्ग कथाकथन सर्तीचें आयोजन केल्लें. विद्यार्थ्यां मदीं वाचनाची आवड निर्माण जावची तशेंच तांचो आत्मविस्वास घटमूट जावचो म्हूण ह्या सर्तीचें आयोजन केल्लें.
कार्यावळीचे सुरवातेक प्रभारी शिक्षिका कविता गांवकार हांणी साहित्यिकांच्या फोट्याक फुलांहार घालून आर्गां ओंपलीं. तेच बरोबर शिक्षिका पुर्वा कोमरपंत हांणी साहित्यिकांच्या कोंकणी आनी मराठी साहित्य मळा वेल्या कार्या विशींची विस्तारान म्हायती विद्यार्थ्यांक सांगली.
हे सर्तींत वट्ट 15 विद्यार्थ्यांनी वांटो घेतिल्लो. तातूंत नितल गांवकार हाका उमेद वाडोवपी इनाम फावो जालें. जाल्यार महेश गांवकार हाका तिसरें, रश्मी म्हाळशी हाका दुसरें जाल्यार प्राची उदय गडो हाका पयलें इनाम फावो जालें.
सगले शिक्षक आनी शिक्षकेतर वर्गाच्या सहकार्यान ही कार्यावळ येसस्वी जाली.
कार्यावळीचें सुत्रसंचालन शिक्षिका आरती पैंगीणकार हांणी केलें जाल्यार शिक्षक संदीप गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
