भांगरभूंय | प्रतिनिधी
आलेक्स सिक्वेराः शेतकारांच्या शिश्टमंडळाक घेवन नितीन गडकरीक मेळटलों
भांगरभूंय । प्रतिनिधी
मडगांवः पोरणो बोरी पूल मोडपा मेरेन सरकार वाट पळोवपाक शकना. ते आदीं पर्यायी पूल बांदपाची गरज आसा. केंद्रीय मंत्री नितीन गडकरी गोंयांत येतात. तांणी मेळपाचो वेळ दिल्यार शेतकारांच्या शिश्टमंडळा सयत तांचे कडेन चर्चा करून हो विशय सोंपयतले, अशें मंत्री आलेक्स सिक्वेरा हांणी सांगलें.
मडगांवच्या लोकांची समस्या आयकून घेतले उपरांत मंत्री सिक्वेरा हांणी नव्या बोरी पुलाच्या बांदकाम करतना एकूय घर मोडचे नात. पोरणो बोरी पूल मोडचे आदीं नवो पूल बांदपाची गरज आसा. ते खातिरूच नवो पूल बांदपाचो गोंय सरकार यत्न करता. लोटलेच्या पुलाच्या बांदकाम प्रस्नाचेर थळाव्या शेतकारा कडेन लेगीत चर्चा केल्या. कोणाच्या जमनीचेर हो पील बांदतलो हो प्रस्न आसा. पूल बांदपाच्या प्रस्तावा वेळार सात विवीध मार्गाचे अलायमेंट दाखयल्यात. भौशीक बांदकाम विभागाच्या अधिकाऱ्या कडल्यान तीन ते चार दिसां आदीं नवो पूल बांदपा खातीर परतून सर्वे केला. तांणी लोकां कडल्यान लेगीत गरजेच्यो त्यो सुचोवण्यो आयकून घेतल्यात. ते पळोवणेचो अहवाल येवपाचो उरला. तातूंत आनीक कांय सुचोवण्यो करपाक शकतात. त्या अहवालाची वाट पळयतात. अहवाल मेळ्ळे उपरांत फुडली प्रक्रिया तशेंच मार्गा विशींचो निर्णय घेतले.
केद्रीय रस्ते येरादारी आनी म्हामार्ग मंत्री नितीन गडकरी हे 11 वा 12 जुलयाक गोंयांत येतात. तांचे कडेन मेळपाचो वेळ मागला. तांणी मेळपाचें मान्य केलें जाल्यार शेतकारांच्या शिश्टमंडळा सयत मंत्री गडकरी हांकां मेळटलों. तांचे कडेन चर्चा करून फुडलो मार्ग काडटले. दादागिरी वा चेपण हाडून काम करून घेवपाक जावचें ना, अशें आपल्याक दिसता. शेतकारां वतीन हरीत लवादा कडेन याचिका दाखल केल्या. ते संबंदांत कसलो निर्णय येता ते पळयतले, अशेंय सिक्वेरा हांणी स्पश्ट केलें.
जल्म प्रमाणपत्रांतलें बदल, म्युटेशन, जमीन रुपांतराच्यो समस्या लोकांनी मांडल्यो. तशेंच वार्का पंचायतीचे पंच मेळपाक आयिल्ले. जिल्होधिकारी कार्यालयांतल्या उदेंते वटेंतले शौचालयांचें काम पुराय जालां. कांय सेन्सर बसोवपाचे उरल्यात. कांय जाण मोडपाक पाविल्ले झाडाचे खांदे मारपाक सांगतात, जाल्यार दुसरे वटेन कांय जाण झाडां मारची न्हय, अशीं मागणी करतात. ताका लागून हातूंतल्यान मार्ग काडप कठीण जाता, अशेंय सिक्वेरा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
