भांगरभूंय | प्रतिनिधी
फोंडें, प्रतिनिधी ः पार-उसगांवच्या अंडरपासा लागसार व्हड प्रमाणांत स्कुटरी उब्यो केल्ल्यान येरादारीक धोको निर्माण जाता. सकाळीं उब्यो केल्ल्यो गाडयो रात मेरेन एकेच सुवातेर आशिल्ल्यान अंडरपासांतल्यान वचपी वाहन चालकांक अपघात जावपाचो धोको आसा. अंडरपासाच्या सकयल स्कुटरी उब्यो करपी चालकाचेर येरादारी पुलिसांनी कारवाय करची अशी मागणी वाहन चालक करता.
पार -उसगांवच्या अंडरपासा लागसार जायत्यो स्कुटरी उब्यो आसतात. देखून उसगांव, पाळी, वाळपय आनी हेर वाठारांतल्यान येवपी वाहनां अंडरपासांतल्यान फोंडें वटेन वतात. अंडरपासा लागसार स्कुटरी उब्यो केल्ल्यान येरादारीक धोको निर्माण जाता. फोंडें आनी हेर वाठारांनी काम करपी कामगार आपल्यो स्कुटरी अंडरपासा लागसार उबारून सकाळीं वतात. ते उपरांत दीसभर उब्यो आशिल्ल्यो दुचाकी गाडयो येरादारी खातीर धोक्याचे जावपाक लागल्यात.
फाटल्या म्हयन्याच्या काळांत पार उसगांव वाठारांत जायते अपघात जाल्यात. तांतूत मरण येवप्या वांगडाच कांय जाण जखमींय जाल्यात. देखून अंडरपासा लागसार उब्यो केल्ल्यो स्कुटरी धोकादायक आसून अपघात जावपाक कारण थारुं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.