भांगरभूंय | प्रतिनिधी
अस्ताना, खबरां संस्था: भारत आनी चीनान अस्तंत लडाखा मदले उरिल्ले प्रस्न सोडोवपा खातीर आनी संबंद थीर आनी परत बरे करपा खातीर दुपेटीन यत्न करपाचें आस्वासन दिलें. परराष्ट्र मंत्री एस जयशंकर आनी चिनाचे परराष्ट्र मंत्री वांग यी हांचे मदीं बिरेस्तारा कझाकस्तानची राजधानी अस्ताना हांगा शांघाय को-ऑपरेशन ऑर्गनायझेशन (एससीओ) शिखर परिशदेचे फाटभूंयेर एक बसका जाली.
ह्या वेळार जयशंकर हांणी म्हणलें, वास्तवीक नियंत्रण रेशेचो (एलएसी) आदर करपाक जाय. दोनूय फुडार्यां मदल्या भाशणांत जयशंकर हांणी सीमा वेवस्थापना खातीर भुतकाळांत दोनूय वटेन सय केल्ल्या संबंदी द्विपक्षीय करार आनी नेम पुरायेन पाळचे अशी गरज उक्तायली. परराष्ट्र मंत्रालयान जारी केल्ल्या निवेदना प्रमाण, जयशंकर आनी वांग हांणी अस्तंत लडाखांतले एलएसीवेल्यो आडकून उरिल्ल्यो समस्या रोखड्योच सोडोवपा खातीर खोलायेन चर्चा केली, जाका लागून ‘द्विपक्षीय संबंद थीर आनी संबंधांची पुनर्निर्मिती करची’. बसकेंत, परराष्ट्र वेव्हार मंत्र्यांनी भारताच्या दृश्टिकोनाचो पुनरुच्चार केलो. तांणी म्हणलें, दोनूय वटेनचे संबंद आदर, हित आनी परस्पर संवेदनशीलतेचेर आदारून आसपाक जाय.
दोनूय देशां मदल्या सामान्य संबंदा खातीर शिमेवयल्या वाठारांनी शांतताय आनी स्थिरताय म्हत्वाची अशें भारत मानता. भारत-चीन शीम प्रकरणाचेर समन्वय (डब्ल्यूएमसीसी) बेगीनूच मेळपाक जाय. दोनूय मंत्र्यांनी सहमती दर्शवली काय शिमे वयल्या भागात सध्या ताण वाडोवप कोणाच्याच हिताचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
