भांगरभूंय | प्रतिनिधी
कोची, खबरां संस्था ः केरळांतल्या कोझीकोडांत मेंदू खावपी अमीबाच्या संसर्गाक लागून (अमीबिक मेनिंगोएन्सेफलायटीस) 14 वर्सां पिरायेच्या भुरग्याक मरण आयलें. खबरां प्रमाण मृदुल नांवाचो हो भुरगो ल्हान तळ्यांत न्हावपाक गेल्लो, ताका लागून ताका हो संसर्ग जालो.
बुधवारा रातच्या 11.20 वरांचेर मृदुलाक मरण आयिल्ल्याची म्हायती केरळ भलायकी खात्यान दिली. ताचेर खाजगी हॉस्पिटलांत उपचार सुरू आशिल्ले. ‘प्राइमरी अमीबिक मेनिंगोएन्सेफलायटिस’ म्हळ्यार पीएएम संसर्ग घाणयारे उदकांत मेळपी प्री-लिव्हिंग अमीबाक लागून जाता. नाकाचे पातळ कातींतल्यान तो कुडींत भितर सरता.
मे ते जुलय मेरेनची तिसरी घडणूक
मे 2024 उपरांत केरळांत संसर्गाची ही तिसरी घडणूक. 21 मे दिसा मलप्पुरमांत पांच वर्सां पिरायेच्या चलयेक मरण आयिल्लें. उपरांत 25 जून दिसा कन्नूरांतल्या 13 वर्सां पिरायेच्या चलयेक मरण आयलें. हाचे आदीं 2023 आनी 2017 वर्सा राज्यांतल्या दर्यावेळे वयल्या आलाप्पुझा जिल्ह्यांत हो दुयेंस सांपडिल्लो. जोर येवप, तकली दुखप, उलटी जावप आनी चक्कर येवप हीं ह्या दुयेंसाची लक्षणां.
मेंदू खावपी अमीबा
यूएस सेंटर्स फॉर डिसीज कंट्रोलच्या मतान पीएएम हो मेंदवाक जावपी संसर्ग जो अमीबा वा नेग्लेरिया फॉवलेरी नांवाच्या एकल-पेशी जीवांक लागून जाता. हो अमीबा तळीं, न्हंयो आनी उश्ण झरे अशा मातयेंत आनी उश्ण गोड्या उदकांत रावता. सादारणपणान ताका ‘ब्रेन इटिंग अमिबा’ अशें म्हण्टात, कारण अमीबा आशिल्लें उदक नाकांत भितर सरता तेन्ना तें मेंदवाक संसर्ग करता. प्रायमरी अमीबिक मेनिंगोएन्सेफलायटिस’ म्हळ्यार पीएएम हातूंत मेंदू खावपी अमीबा मनशाच्या मेंदवाक संसर्ग करून मांस खाता.
हो एक सामान्य अमीबा न्हय, जाचेर प्रतिजैव वखदां दिवन उपचार करूं येतात. तो इतलो घातक की संसर्ग वेळार थांबलो ना जाल्यार 5 ते 10 दिसां भितर मनशाक मरण येवंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
