फिल्मी खबरो
भांगरभूंय | प्रतिनिधी
‘अॅनिमल’ परस चड हिंसा आशिल्लो ‘किल’ आयज थेटरांत
आंतरराष्ट्रीय फिल्म महोत्सवांनी प्रदर्शीत जावन समिक्षकांची तोखणाय जोडपी ‘किल’ फिल्म आयज प्रदर्शीत जाता. करण जोहर आनी गुनीत मोंगा हांची निर्मीती आशिल्ल्या ‘किल’ ह्या हिंदी फिल्मांत ‘अॅनिमल’ फिल्मा परस चड हिंसा आसा असो निर्मात्यांनी दावो केल्लो. ह्या फिल्मांत लक्ष्या आनी राघव जुयल आसात. ह्या फिल्माक ‘ए – अॅडल्ट ओन्ली’ प्रमाणपत्र मेळ्ळा. 1 वर 46 मिण्टांच्या ह्या फिल्मांत अॅक्शन भरपूर आसा. हें फिल्म फकत 1000 स्क्रिनांचेर प्रदर्शीत जाता. थेटरांनी ह्या फिल्माचे मर्यादित शो आसतलें.
सिकंदरा बरोबर कटप्पाची जोडी
बाहुबली फिल्माक लागून फामाद जाल्लो सथ्यराज म्हणल्यारूच सगल्यां खातीरचो कटप्पा बॉलीवूडींत परत येता. हें फावट ‘सिकंदर’ फिल्मांत तो दिसतालो. हें फिल्म फुडल्या वर्सां प्रदर्शीत जातलें. सथ्यराजान ह्यान पयलीं बॉलीवूडांत ‘चेन्नय एक्स्प्रेस’, ‘राधे श्याम’ आनी ‘मुंज्या’ फिल्मांत काम केला. तिनूय फिल्मांतल्या ताच्या अभिनयाची तोखणाय जाल्ली.
आतां सिकंदर फिल्मांत ताची म्हत्वाची भूमिका आसतली. सिकंदराची भूमिका दबंग स्टार सलमान खान करतलो. तशेंच प्रतीक बब्बराचीय ह्या फिल्मांत वेगळी भूमिका आसा.
‘मुंज्या’ची 100 कोटी क्लबांत
‘कल्की’ फिल्माच्या वादळांत लेगीत ‘मुंज्या’ हॉररपटान आपलें अस्तीत्व तिगोवन दवरतना 100 कोटी क्लबांत प्रवेश केलो. ह्या फिल्मान आतांमेरेन 101 कोटींचो वेवसाय केलो. ह्या फिल्माक सुपर डुपर हिट टॅग लागला. आदित्य सरपोतदार हांच्या दिग्दर्शना खाला तयार जाल्ल्या ह्या फिल्मांत मुंबय आनी कोकण भागांत चड जोडलां.
कल्कीच्या वादळांत ‘इश्क विश्क रिबावंड’ फ्लॉप
प्रभास, अमिताभ बच्चन अभिनीत ‘कल्की’ फिल्मा मुखार ‘इश्क विश्क रिबावंड’ फिल्म चलूंकच ना. ह्या फिल्मान पयल्या सप्तकांत फकत 5 कोटींचो वेवसाय केलो. 20 कोटींत तयार जाल्लें हें फिल्म नव्या पिळगेक मुखार दवरून ऑनलायन डेटींग ह्या विशयाचेर आधारित आसा. निपुण धर्माधिकारी हांच्या फिल्म प्रॉडक्शनान 2003त शाहिद कपूर आनी अमृता राव हांच्या पदार्पणाचे फिल्म ‘इश्क विश्क’ काडिल्लें. तें फिल्म हिट थारिल्लें. आतांय धर्माधिकारीन पश्मीना रोशन आनी जिब्रान खान हांकां पदार्पणाची संद दितना ‘इश्क विश्क रिबावंड’ फिल्म काडलां. मात, कल्की मुखार हें फिल्म कोणाक दिसलेंच ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
