भांगरभूंय | प्रतिनिधी
पोटदुखी कशीच थांबना जाल्यार मात दोतोराचो सल्ल घेवचो. ताच्या सल्ल्याबगर कसलेंच भायलें वखद घेवचें न्हय.
जाय ते फावटी ल्हान भुरग्याक पोटदुखीची समस्या जाणवता. तीन वर्सां ते णव वर्सां मेरेन भुरग्यां मदीं हें दिसून येता. हे पोटदुखीची खुबशीं कारणां आसूं शकतात. केन्ना केन्ना कितेंय खालें जाल्यार पोटांत गॅस जाता. खाल्लें अन्न पचना. गोड जीनस खाले काय जंत जातात. भुरग्यांचो आहार, ताचेर आशिल्लो ताण पसून पोटदुखीचें एक कारण जावं शकता. सदांच पोटदुखी जावप, भुरगें अस्वस्थ जावप बरें न्हय.
अपचन हें पोटदुखीचें पयलें कारण जावन आसा. भरपूर खावप, थंड पेयां पियेवप, जंक, चायनीस फूड खावप हाका लागूनच पोटांत दुखता. वाजेवन आवडनाशिल्लो पदार्थ खाल्यारुय पोटदुखी जाता. घरगुती उपाय केल्यार ही पोटदुखी बरी जाता. हुनहुनीत उदक पियेवप, पोटाक गरम उदकाचो शेक मारप, अपचनाचें वखद घेवप, कोडू किरायतें सप्तकांतल्यान एक फावट तरी पियेवप वा ताचीं पानां खावप बरें. कोठ्याची पिडा (बद्धकोश्ठ) हेंय भुरग्यांचे पोटदुखीचें एक कारण आसूं शकता. संडास सारको जावंक ना जाल्यार तांकां त्रास जावं शकता. ह्या वेळार हुनहुनीत उदक पिवप. तंतूमय (फायबर) जीनस खावप. डायेरियाक लागूनन पायांत गुळे येतात. कळ मारता. जोर येता. भुरग्याच्या संडासाची तपासणी केल्यार अचूक विकाराचो अदमास येता.
दंत हें पोट दुखपाचें आनीक एक कारण. मातयेच्या वातावरणांत रावपी भुरग्यांक जंत जातात. वखद घेतल्यार ते उणे जातात. चल्यां परस चलयांक हे विकार चड आसता. पोट, ओटीपोटांत दुखप. तकली फोडप, ओंकारी येवप, हुस्को दिसप ह्या कारणांक लागूनय पोट दुखता. खाणाची अॅलर्जीक लागूनच हो त्रास जाता. दुदाची पसून अॅलर्जी आसता.
पोटदुखी कशीच थांबना जाल्यार मात दोतोराचो सल्ल घेवचो. ताच्या सल्ल्याबगर कसलेंच भायलें वखद घेवचें न्हय. भुरगो न्हिदत जाल्यार कांय प्रमाण पोट दुखपाचें थांबता.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
