भांगरभूंय | प्रतिनिधी
विराट-पर्व 3
मत्स्य देशांत दुर्योधन
(अशें तरेन किचकाक कोणें मारलो हें निमाणें मेरेन कोणाकूच कळ्ळें ना…. आतां मुखार…)
किचकाक कोणेंतरी रातच्या वेळार मारून उडयलो ही खबर सगल्या राज्यांनी रोखडीच पाताळ्ळी. त्रिगर्त राज्याचो राजा सुशर्मा हाका ती खबर आयकून खूब खोस जाली. किचकान खूब फावटी सुशर्माक लडायेंत हारयल्लो आनी लज केल्ली. “मेलो! बरें जालें.” असो विचार करून आतां मत्स्य देशाचेर घुरी घालपाक बरी संद आसा, तेन्ना विराटाची गोरवां चोरून हाडपाची ताणें येवजण केली.
किचकाच्या मरणाची खबर हस्तिनापूरांत पावतकच दुर्योधनाचे तकलेंत दुबावाचे किडे वळवळूंक लागले. किचक खूब बळिश्ट आशिल्लो. ते खातीर ताचो गळो आंवळून मारपी तसोच बळिश्ट आसूंक जाय. किचकाक रातच्या वेळार मारला, कोणें मारला हें कळचें न्हय अशें तरेन मारला. हे सगले विचार ताच्या मनांत आयले.
हें काम भीमाचेंच आसतलें हाची ताका खातरी जाली. भीम विराट नगरांत आसा जाल्यार हेर पांडवूय थंयच आसतले हे दुर्योधनाच्या लक्षांत आयलें. ह्या वेळार मत्स्य देशाचेर घुरी घाली जाल्यार किचक नाशिल्यान विराट राजाक मजत करपाक पांडव फुडें आयल्या बगर, रावचें नात. त्या वेळार तांची वळख जाली जाल्यार पांडवांक परत बारा वर्सा वनवास आनी एक वर्स अज्ञातवास भोगपाक धाडूंक मेळटलें असो विचार दुर्योधनान केलो.
त्याच दिसांनी त्रिगर्त राजाचो राजा सुशर्मा दुर्योधनाक मेळपाक आयिल्लो. उलयता उलयता सुशर्मान आपूण मत्स्य देशाचेर घुरी घालून विराटाची गोरवां चोरुन व्हरपाचो आसा अशें दुर्योधनाक सांगलें. जालें! दोगांयचे विचार सामके जुळ्ळे. तांणी मागीर कितें करपाचे ताची वेवस्थीत येवजण केली. थारायिल्ल्या दिसा सुशर्मान मत्स्य देशाचेर दक्षीण दिकेच्यान घुरी घालप, विराटाचें सैन्य ते दिकेक गेले म्हणटकच दुसऱ्या दिसा दुर्योधनान उत्तर दिकेच्यान घालो घालून विराटाचीं जाता तितलीं गोरवां आमडून व्हरप अशी तांणी मांडणी केली. सगळी येवजण जाले उपरांत लडायेची तयारी करपाक सुशर्मा आपल्या राज्यांत परत गेलो.
सुमार पंदरा- वीस दिसांनी सुशर्मान दक्षीण दिकेंतल्यान मत्स्य देशाचेर घुरी घाली. ताचे सैनीक विराट राजाच्यो गायो आमडीत व्हरुंक लागले. अशें कितें जायत हें थंय आशिल्ल्या राखण्यांनी चिंतुकूच नाशिल्लें. ते कायच करुंक शकले नात. कांय राखणे बेगीबेगीन विराट राजा कडेन गेले आनी ताणी त्रिगर्त राज्याचो राजा सुशर्मा, तांच्यो गायो चोरून व्हरता अशें सांगलें. विराटान रोखडेच आपले सैन्य एकठांय केलें आनी सुशर्मा आड लडाय करपाक वचपाची तयारी सुरु केली. इतल्यान युधिश्टीर, भीम, नकुल अभी सहदेव हे थंय आयले आनी तांकाय विराटा वांगडा येवपाची इत्सा आसा हें सांगलें. तें आयकून विराट राजाक अजाप दिसलें आनी खोसूस जाली. तांणी जापल्या भावाक त्या चवगांकूय रथ आनी तांकां जाय तीं शस्त्रां दिवपाक सांगलीं. सगली तयारी जातकच राजान कांय सैन्य नगरांत दवरलें आनी उरिल्लें सैन्य घेवन तो आपली गोरवां सोडोवन हाडपाक दक्षीण दिकेन गेलो.
बरोच फाटलाव केल्या उपरांत विराटाक सुशर्माचे सैनीक गायो आमडीत व्हरतना दिश्टी पडले. मागीर दोनूय सैन्याची मोटी लडाय जाली. किचक आतां ना हें खबर आशिल्ल्यान सुशर्माचे सैनीक नेटान लडताले. तांणी विराटाकूच धरलो आनी रथांत बांदून घालून ताका व्हरुंक लागले. तें पळोवन चवगूय पांडव सुशर्माच्या सैन्यार तुटून पडले. सुशर्माक अचकीत कितें जालें हें कळ्ळेंच ना. भीम ताच्या रथार केन्ना चडलो आनी ताका सकयल उडोवन केन्ना बांदून घालो हें ताच्या लक्षांत आयलेंच ना. सुशर्माक धरलो हें पळोवन ताचें सैन्य पळत सुटलें. विराटाच्या राखण्यांनी तांच्यो सगल्यो गायो एकठांय केल्यो आनी तांका तांच्या गोठ्यां वटेन आमडिल्यो. भीमान मागीर विराटाक सोडयलो आनी बांदून घाल्ल्या सुशर्माक ताच्या मुखार उबो केलो. सुशर्माक सामकी लज जाली. ते खातीर विराटान चड ताणून धरुंक ना. तांणे सुशर्माक, परत आनीक असलें धाडस करुं नाका अशी शिटकावणी दिवन सोडून दिलो. विराट राजा पांडवांच्या पराक्रमाचेर खूब खोशी जालो आनी ताणें तांची तोंड भरून तोखणाय केली. भीमाक तर ताणें वेंगूच मारली. हें सगलें जाता म्हणसर काळोख जालो. ते खातीर विराट आनी ताचे सैन्य थंयच रावले आनी तांणी दुसऱ्या दिसा सकाळीं विराट नगरांत वचपाचें थारायलें.
फुडें चलता
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.