भांगरभूंय | प्रतिनिधी
पणजीः दिवाडी जुंव्याचेर रेबिजाचीं प्रकरणां सांपडले उपरांत पशु संवर्धन खात्यान थंय वासिनां दिवपाची मोहीम हातांत घेतल्या. जुंव्या वयल्या सगळ्या रस्ताद सुण्यांचें तीन दिसां भितर वासिनां दिवपाचें काम पुराय करतले, अशी म्हायती मिशन रेबिजाचे संचालक डॉ. मुरुगन अप्पूपिल्लई हांणी दिली.
हालींच खात्याचे मंत्री निळकंठ हळर्णकार हांणी हे विशीं विशेश बसका घेतली. ह्या वेळार तांणी 100 दिवाडी जुंव्याचेर 100 टक्के वासिनां दिवपाचे आदेश दिले.
डॉ. मुरुगन हांणी सांगलें, दिवाडी जुंव्याचेर सुमार 1500 रस्ताद सुणीं आसात. सध्या आमी 878 सुण्यांक वासिनां दिल्यांत. शेनवार मेरेन आमी 100 टक्के वासिनां दिवपाचो यत्न करतले. जुंव्यां वयली लोकसंख्या सुमार 6 हजार आसा. ते तुळेंत थंयच्या सुण्यांची संख्या प्रमाणांत ना. जुंव्याचेर कोणे तरी सुण्याचीं पिलां सोडली आसपाक जाय वा जुंव्या वयल्या रस्ताद सुण्यांक बरें अन्न मेळटा म्हूण तांच्या सैमीक मरणाचें प्रमाण देंवलां आसपाची शक्यताय आसा. सध्या खात्या वतीन घराघरांनी वचून जागृताय करतात. पोशिल्ल्या सुण्यांक लेगीत वासिनां दितात. हे आदीं एका एनजीओ वरवीं वासिनां दिताले. मात फाटलीं दोन वर्सां ही एनजीओ थंय येवकूच ना. मात आमी आतां 100 टक्के वासिनां दिवपाची मोहीम पुराय करतले. तशेंच थंय वर्सभर अश्यो मोहिमो हातांत घेतले. भोवतेक पेबीज प्रकरणां ही शिमे वयल्या राज्यांतल्यान संक्रमीत जातात. ताका लागून दुसऱ्या राज्यांतल्यान सुणीं गोंयांत हाडटना तांकां वासिनां दिल्यात काय नात ताची खात्री करप गरजेचें आसा, अशें डॉ. मुरुगन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
