भांगरभूंय | प्रतिनिधी
विरोध जालो तरीय पुराय करपाचो पंचायतीचो निश्चेव
भांगरभूंय । प्रतिनिधी
फोंडें: बेतोडें पंचायतीन वैद्यनगरांत उबारिल्लो कोयर प्रकल्प सुरू करपाचेर पंचायत मंडळ ठाम आसा. मात थळाव्या लोकांच्या विरोधाक लागून कोयर प्रकल्पाचें काम सुमार 10 टक्के पुराय करपाक पंचायतीक अपेस आयलां. कोयर प्रकल्पाचें 90 टक्के काम पुराय जाले उपरांत थळाव्या लोकांनी विरोध केल्ल्यान पंचायत मंडळ त्रासांत पडिल्ल्याचें दिसता.
आत्मनिर्भर भारत निधी वापरून पंचायत मंडळान सुमार 45 लाख रुपया खर्च करून कोयर प्रकल्प उबारला. प्रकल्पाचें 90 टक्के काम पुराय जाले उपरांत थळाव्यांनी विरोध केला. दत्तगड, कासारवाडो आनी वैद्यनगर ह्या तीन गांवांतल्या लोकां खातीर हो प्रकल्प म्हत्वाचो थारतलो. मात वैद्यनगरांतल्या लोकांनी प्रकल्पाक विरोध केल्ल्यान हें काम फाटल्या कितल्याशाच म्हयन्यां सावन आडकून आसा. तातूंत थळाव्या लोकांनी प्रकल्पा कडेन वचपी रस्त्याचेर फोंडकूल मारून दवरलां. ताका लागून फाटल्या कितल्याशाच म्हयन्यां सावन ह्या प्रकल्पाचेर कोणूच लक्ष दिना. बेतोडेंचे सरपंच मधू खांडेपारकार हांणी सांगलें, कोयर प्रकल्पाचें काम 90 टक्के पुराय जाले उपरांत लोकांनी ह्या प्रकल्पाक विरोध केला अशें सांगलें. मात आडकून उरिल्लें काम पुराय करून कोयराची समस्या सोडोवपाचो यत्न करतले अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
