भांगरभूंय | प्रतिनिधी
नवी दिल्ली, खबरां संस्था: नवी भारतीय न्यायवेवस्था संहिता १ जुलय सावन लागू जाली. देखून कागाळी सावन गुन्यांवांच्या कलमां मेरेन जायते बदल तुमकां दिसतले. हातूंतलो एक बदल म्हळ्यार व्हॉट्सऍपाचेर कागाळी. आदीं गुन्यांव कळोवपाचो आसल्यार पुलीस स्टेशनांत वचपा बगर पर्याय नाशिल्लो, पूण आतां तशें ना. भारतीय नागरी सुरक्षा संहितेंत एक नवी तजवीज केल्या. देखून आतां सरळ पुलीस स्टेशनांत वचपाची गरज ना पूण व्हॉट्सऍपा वरवींय हें काम करपाक मेळटा.
एकादी कागाळ करपाक जाय पूण शिक्षण, नोकरी, वेवसाय वा हेर जापसालदारक्यो आनी परिस्थितीक लागून प्रत्यक्षांत पुलीस स्टेशनांत वचपाक मेळना अश्यो जायत्यो परिस्थिती येतात. पूण भारतीय नागरी सुरक्षा संहितेंत तरतुदी केल्यात आनी कागाळीचे हेर मार्ग उक्ते केल्यात. भारतीय नागरी सुरक्षा संहितेच्या कलम ५३० प्रमाण सगल्या प्रकरणांची कार्यवाय व्हिडियो कॉन्फरन्सिंगांतल्यान करपाची तरतूद केल्या. देखून व्हॉट्सऍप, ईमेल वरवीं कागाळ करपाक मेळटली. पूण, फुडल्या ७२ वरां भितर पुलीस स्टेशनांत वचून कागाळीचेर सय करची पडटली.
नव्या तरतुदी प्रमाण खटल्यांचें काम वेगान जातलें. दोनूय वटांनी वकील, साक्षीदार आपल्या-आपल्या सुवातेर सावन आनी आरोपी बंदखणींतल्यान न्यायालयीन कार्यवाहींत हाजीर रावपाक शकतले. गवाय, उलटसुलट चवकशी, वाद बेगीन पुराय जातले आनी न्यायालयांक वेळार निर्णय दिवपाक मेळटलो.
आरोपींक बंदखणींतल्यान न्यायालयांत हाड- व्हर करतना पुलिसांचें मनीसबळ फुकट वतालें. तशेंच तांचो कामाचो वेळ फुकट वतालो. मात नव्या तरतुदीं प्रमाण आरोपीक न्यायालयांत हाजीर करपाची गरज आसची ना. आतां उण्यांत उणो मनीसबळ खर्चाचेर भर दितले. आतां सावन आरोपीक समन्स जारी केल्या उपरांत पुलिसांक वयक्तीक रितीन समन्स दिवपा खातीर आरोपीच्या घरा वचपाची गरज पडची ना अशी तरतूद नव्या कलमांत आसा.
आरोपीक ताच्या सोशल मिडिया वरवीं धाडिल्ले समन्सूय अधिकृत धरतले. ताका लागून आरोपी, फिर्यादी, साक्षीदार, पंच हांच्या मोबायल क्रमांकां सयत ई-मेल, व्हॉट्सऍप क्रमांक, हेर खात्यांचे तपशील पुलिसांक सेव करचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
