भांगरभूंय | प्रतिनिधी
मडगांव, प्रतिनिधी : कुठ्ठाळे राष्ट्रीय महामार्गा लागसार लिओनेल ऊर्फ पिंकू लोबो (३२) ह्या तरणाट्याचे तकलेर शिमीटाचो ब्लॅाक घालून ताचो खून केलो. ह्या प्रकरणांत वेर्णा पुलिसांनी पिंकू लोबो हाचो इश्ट आलेक्स झेवियर फ्रान्सीस्को कुतिन्हो (३४) ह्या दुबाविताक चवकशे खातीर ताब्यांत घेतला.
घडणुके सुवातेर गॅरेज चलोवपी व्यक्तीन सांगलें, दोग जाण दुचाकी वेल्यान आयिल्ले. घडणुके सुवातेचे दिकेन ते गॅरेजी कडेन आयले. दुचाकेचें काम करपाचें आसा अशें सांगून दुचाकी थंयच लावन ते थंयच्या गेले.
ते सुवातेच्या धनयाचेंय कांयच काम सुरू नाशिल्ल्यान थंय कोणून नाशिल्ले. सीसीटीव्ही फुटेज पळयली तेन्ना तातूंत दोग जाण दिसतात.
पुलिसांक हे घडणुके म्हायती मेळ्ळे उपरांत वेर्णा पुलिसां सयत पुलीस अधीक्षक सुनीता सावंत, उपअधीक्षक सलीम शेख हांणीय घडणुके सुवातेची पळोवणी केली. वेर्णा पुलिसांक घडणुके सुवाते वेल्यान मेळिल्ली म्हायती, सीसीटीव्ही फुटेज आनी हेर पुराव्यांवेल्यान एका दुबाविताक ताब्यांत घेता. हे विशीं वेर्णा पुलीस निरीक्षक मेल्सन कुलासो हांच्या मार्गदर्शना खाला फुडलो तपास करतात.
हे घडणुकेची म्हायती मेळटाच आमदार आंतोन वाझ हांणी सांगलें, अश्यो घडणुको वस्ती आनी म्हामार्गा कुशीक घडप आनी ताची कोणाकूच म्हायती नासप हाका लागून असुरक्षितपणा वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
