भांगरभूंय | प्रतिनिधी
तिसवाडींत वर्सभरांत दितले रेबिजाचीं वासिनां
भांगरभूंय । प्रतिनिधी
पणजीः हालींच दिवाडी जुंव्याचेर दोन सुण्यांक रेबिजाची लागण जाल्ल्याची म्हायती मुखार आयल्या. हातूंतलो एक सुणो पोशिल्लो आसा जाल्यार दुसरो रस्ताद.
दिवाडी हें तिसवाडी म्हालांत येता. ताका लागून थंय वर्सभर रेबीज वासिनां दिवपाची मोहीम हातांत घेतले. गोंयांत अंदूं आतां मेरेन रेबिजाचीं वट्ट चार प्रकरणां सांपडल्यांत, तरी लेगीत परिस्थिती नियंत्रणांत आशिल्ल्याची म्हायती मिशन रेबिजचे संचालक डॉ. मुरुगन अप्पूपिल्लई हांणी दिली.
गोंयांत फाटलीं कांय वर्सां दिवचल, सांगें आनी हेर शिमेर आशिल्ल्या म्हालांनी रेबिजाचीं प्रकरणां सांपडिल्लीं. दुसऱ्या राज्यांतल्यान वासिनां दिवंक नाशिल्लीं सुणीं वा हेर जनावरां गोंयांत हाडिल्ल्यान तांचे वरवीं तें गोंयांत पातळटा. कांय म्हयन्यां आदीं दिवचले अशें एक प्रकरण सांपडिल्लें. त्या सुण्यांच्या संपर्कांत आयिल्लो सुणो वा जनावर दिवाडी जुंव्याचेर हाडिल्ल्यान थंय रेबिजाची लागण जाल्या आसूं येता, अशी शक्यताय आसा, अशें डॉ. मुरुगन हांणी सांगलें.
रेबिजाची लागण आडावपा खातीर मिशन रेबिजा वतीन तिसवाडी सयत हेर म्हालांनी जनजागृती मोहीन हातांत घेतले. तशेंच रेबिजाची लागण जावपाची शक्यताय आशिल्ल्या म्हालांनी विशेश फुकट वासिनां दिवपाची मोहीम परतून सुरू करतले. गोंयांतलीं भोवतेक रेबीज प्रकरणां ही शिमे वयल्या राज्यांतल्यान गोंयांत येतात. ताका लागून दुसऱ्या राज्यांतल्यान सुणो वा हेर जनावरां गोंयांत हाडटना तांकां वासीन दिल्ल्याची खात्री करपाची गरज आसा, अशें डॉ. मुरुगन हांणी सांगलें. मेळिल्ले म्हायती प्रमाण गोंयांत 2022 त रेबिजाचीं 28 प्रकरणां सांपडिल्लीं. जाल्यार 2023 त 47 जनावरांक रेबिजाचीं लागण जाल्ली. तशेंच 2018 ते 2022 मेरेन गोंयांत एकूय व्यक्तीक रेबीजची लागण जावंक नाशिल्ली. मात सप्टेबर 2023 त गोंयांत रेबिजाची लागण जाल्ले एके व्यक्तीक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
