जीएसटीक लागून गोंयची अर्थीक उदरगत वाडल्याः मुख्यमंत्री
भांगरभूंय | प्रतिनिधी
पणजी ः राज्यांत 1 जुलय 2017 दिसा जीएसटी कर पद्दत चालीक लायली. हाका लागून फाटल्या सात वर्सांत गोंयची अर्थीक उदरगत वाडल्या. राज्यांतले उद्देजक, वेवसायीक आनी गिरायकांक जीएसटीचो खूब फायदो जाला, अशें मत मुख्यमंत्री डॉ. प्रमोद सावंत हांणी उक्तायलें. गोंय चेंबर ऑफ कॉमर्स आनी धेंपे महाविद्यालया वतीन आयोजीत केल्ल्या कार्यावळींत ते उलयताले. ह्या वेळार उद्देगपती श्रीनिवास धेंपो, अर्थतज्ञ डॉ. मनोज कामत आनी हेर मानेस्त हाजीर आशिल्ले.
जीएसटींतल्यान राज्य सरकाराक बरी येणावळ मेळटा. हाका लागून ह्या वर्साच्या अर्थसंकल्पांत आमी कसलोच कर वाडोवंक ना. हें फकत जीएसटीक लागून शक्य जालां. जीएसटीक लागून राज्यांत निर्गत वाडपाक लागल्या. तशेंच लॉजिस्टीकाचो खर्च सुमार 10 ते 12 टक्क्यांनी उणो जाला. हाचे भायर जीएसटीचो फायदो पर्यटन आनी सेवा क्षेत्राकूय खूब जाला, अशें डाॅ. सावंत हांणी सांगलें.
पयलीं राज्यांत वेगवेगळ्या प्रकाराचे कर आशिल्ले. हाचो वेवसायिकांचेर वायट परिणाम जातालो. दुसऱ्या राज्यांतल्यान म्हाल हाडलो जाल्यार दोनूय राज्यांनी कर भरचो पडटालो. ते उपरांत हांगा आपले सवलती खातीर अर्ज करचो पडलो. जीएसटीक लागून हें पुराय बंद जाल्ल्यान वेवसाय करप सोंपें जालां. सद्याची कर पद्दत सोंपी आनी प्रभावी जाल्या, अशें तांणी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
