भांगरभूंय | प्रतिनिधी
अलीराजपूर, खबरां संस्था: स वर्सां आदीं दिल्लीच्या बुराडींत एका कुटुंबांतल्या ११ वांगड्यांक सामुहीक मरण आयिल्ल्याची घडणूक घडली. हे घडणुकेन दिल्ली सयत पुराय देश हालोवन उडयलो. आतां मध्य प्रदेशांत अशीच एक घडणूक घडल्या. अलीराजपूरांत एकाच कुटुंबांतल्या पांच जाणांक मरण आयलां. पांच जाणांच्यो कुडी घराच्या पांख्याक लोंबकळटना पळोवन गांवाक धक्को बसला. घोव- बायल आनी तांच्या तीन भुरग्यांच्यो कुडी घरांत सांपडल्यात. जिल्लो पुलीस अधीक्षक राजेश व्यास थंय पावले. एफएसएल आनी पोस्टमार्टम अहवाला उपरांत सामुहीक आत्महत्या काय खून आसा हें आमकां कळटलें अशें तांणी सांगलें. व्यास हांचे फाटोफाट फॉरेन्सीक पंगडूय घडणुके सुवातेर दाखल जालो. ते पुरावे एकठांय करपाचें काम करता. स वर्सां आदीं आयज (१ जुलय २०१८) बुराडींत एका कुटुंबांतल्या ११ वांगड्यांनी सामुहीक आत्महत्या केल्ली.
रावडी गांवांत ही घडणूक घडल्या. मरण आयिल्ल्यां मदीं कुटुंब मुखेली राकेश, ताची घरकान्न ललिता, धूव लक्ष्मी आनी दोन पूत अक्षय आनी प्रकाश हांचो आस्पाव आसा. ही सामुहीक आत्महत्या न्हय तर खून असो दुबाव ह्या कुटुंबाच्या सोयऱ्यांनी उक्तायला.
३० जून २०१८ दिसा जाल्ल्या प्रकरणा विशीं
मजगतीं, पुराय देशाक हालोवपी बुराडी सामुहीक आत्महत्या प्रकरणांक आयज स वर्सां जालीं. ३० जून २०१८ दिसा रातच्या सुमार १२ वरांचेर चुंडावत कुटुंबांतल्या ११ जाणांनी (ह्या कुटुंबाक भाटिया अशेंय म्हण्टाले) गोळ घेवन आत्महत्या केली. सुरवेक हे खुनाचें प्रकरण असो दावो केल्लो, पूण पोस्टमार्टम अहवाला प्रमाण सगळ्यांनी आत्महत्या केल्ल्याचें दिसून आयलें. कुटुंबांतल्या लोकांनी एकामेकांक फांशी दिवपाक आदार केलो. कोणाच्याय आंगाचेर कसलेच तरेची जबरदस्ती जाल्ल्याचे पुरावे मेळूंक नाशिल्ले. ह्या सगळ्या वांगड्यांनी रातच्या सारके १२ वरांचेर आत्महत्या केली. दुसर्या दिसा सकाळीं तांच्या घरांत ११ मडीं मेळ्ळीं. ह्या कुटुंबाचो मुखेली ललित भाटिया अंधश्रध्दा आनी जादूटोण्याच्या प्रभावा खाला आशिल्ल्याचें कळ्ळें आनी ताणें आपल्या पुराय कुटुंबाक आत्महत्या करपाक लायली अशें पुलिसांच्या फुडल्या तपासांत उक्तें जालें. ललित भाटियाच्या मानसीक दुयेंसाक लागून ११ जाणांचो जीव गेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
