भांगरभूंय | प्रतिनिधी
दोतोरांक देवाचो दर्जो कित्याक दितात, हें सांगपाची गरज ना.. कोरोनाचो भिरांकूळ काळ याद करात.. जेन्ना लोक घरांत बंद आशिल्ले आनी दोतोर दुयेंतींचेर स्वताचे जिणेची काळजी घेनासतना उपचार करताले तेन्ना दोतोरांचें हें योगदान खर्यांनीच मोलादीक आशिल्लें. दोतोर मनशांक जिवीत दितात. खंयचेय म्हामारींत ते आपलो जीव धोक्यांत घालून दीस रात दुयेंतींची जतनाय घेतात. दुयेंतींक आपलें कुटुंब समजुपी आनी निमाण्या खिणा मेरेन दुयेतींचो जीव वाटावपाचो यत्न करपी दोतोरांचो भोवमान करपा खातीर दर वर्सा १ जुलयाक राष्ट्रीय दोतोर दीस मनयतात. ह्या दिसाचो इतिहास आनी म्हत्व आयज जाणून घेवया:
राष्ट्रीय दोतोर दिसाचो इतिहास
दर वर्सा १ जुलयाक राष्ट्रीय दोतोर दीस मनयतात. नामनेचो दोतोर, शिक्षणतज्ञ आनी बंगालाचो दुसरो मुख्यमंत्री डॉ. बिधानचंद्र रॉय हांच्या वाडदिसा निमतान हो दीस मनयतात. हो दीस मनयपाचो हेतू म्हळ्यार सगळ्या दोतोरांक मान दिवप. भारतांत पयलेच खेपे १९९१ वर्सा डॉ. बिधानचंद्र रॉय हांकां आर्गां ओंपपा खातीर पयलेच फावट ‘डॉक्टर्स डे’ मनयलो. तेन्नाचे बंगालाचे मुख्यमंत्री डॉ. बिधानचंद्र रॉय हांणी भलायकी वेवस्थेंत खूब योगदान दिल्लें. ह्या दिसा ताची जयंती मनयतात. ताचो जल्म १ जुलय १८८२ दिसा बिहारांतल्या पाटणा शारांत जालो. जाधवपूर राजयक्ष्मा हॉस्पिटल, बायलां आनी भुरग्यां खातीर चित्तरंजन सेवा सदन, कमला नेहरू मेमोरियल हॉस्पिटल, व्हिक्टोरिया कॉलेज आनी चित्तरंजन कॅन्स हॉस्पिटल सुरू करपाक तांणी म्हत्वाचें योगदान दिलां.
तांणी गरजेवंतां कडल्यान शुल्क घेवंक ना..!
डॉ. बिधानचंद्र रॉय खूब उण्या शुल्कान लोकांचो उपचार करताले. ताणें गरजेवंतां कडल्यान पयशे लेगीत घेवंक ना. वैजकी कर्मचार्यांचो उणाव आशिल्ल्यान ते स्वता नर्सीचेंय काम करताले. वैजकी मळार तांणी दिल्लें योगदान आयज जायत्या दोतोरांक एक प्रेरणा दिवपी जावन आसा. डॉ. रॉय हांकां भारत सरकारान १९७६ वर्सा भारत रत्न पुरस्कार दिवन ताच्या योगदानाचो भोवमान केलो. इतलेंच न्हय तर तांच्या मरणा उपरांत तांचो वाडदीस ‘राष्ट्रीय दोतोर दीस’ म्हूण मनोवपाची घोशणा दिली.
ह्या दिसाचें म्हत्व कितें?
ह्या दिसा दोतोरांचो भोवमान जाता. जायत्या सुवातींनी कार्यावळी घडोवन हाडटात. जायत्या हॉस्पिटलांनी फुकट शिबिरां आनी फुकट तपासणी सुविधा दिवपा खातीर कार्यावळी घडोवन हाडटात.
हे खेपे विशय कितें?
अंदूं राष्ट्रीय दोतोर दिसा २०२४ चो विशय ‘हीलिंग हँड्स, केअरिंग हार्ट्स’ जावन आसा. ह्या विशयांत दोतोरांच्या समर्पणाचेर भर दिला. जिवीतभर लाखांनी लोकांचो जीव वाटावपाक दोतोरांचो म्हत्वाचो वांटो आसता. तातूंत तांच्या वावराची कदर जाता आनी मनशाच्या जिवितांतल्या दोतोरांचे भुमिकेचो भोवमान जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
