भांगरभूंय | प्रतिनिधी
टोरंटो, खबरां संस्था ः परदेशांत शिकपाक वचपा खातीर भारतीयांचो कॅनडा हो पसंतीचो देश जावन आसा. पूण आतां भारतीय विद्यार्थी कॅनडा कडेन निराश जाल्यात. फाटल्या एका वर्सात जायत्या कारणांक लागून भारतीय विद्यार्थ्यां मदीं कॅनडाचें म्हत्व उणें जालां. आयआरसीसीच्या आंकडेवारी प्रमाण मार्च 2024 वर्सा 4,210 भारतीय विद्यार्थ्यांनी अभ्यास परवान्या खातीर अर्ज केला. मार्च 2022 ते मार्च 2023 ह्या काळांत 25-25 हजार भारतीय विद्यार्थ्यांनी अभ्यास परवान्या खातीर अर्ज केल्लो. ऑक्टोबर 2023 सावन भारतीय विद्यार्थ्यां कडल्यान कॅनडा अभ्यास परवान्याच्या अर्जांत सेगीत उणाव आयला. फाटल्या वर्साच्या तुळेंत 2023 वर्साच्या निमाण्या तिमाहींत भारतीय विद्यार्थ्यांक दिल्ल्या शिक्षणीक परवानो अर्जांत 86 टक्क्यांनी उणाव जाला. 1.08 लाख व्हिसा परवाने जारी केल्यात. ऑक्टोबर ते डिसेंबर ह्या काळांत अभ्यास परवान्यांचो आंकडो 14,910 जालो.
भारतीय विद्यार्थ्यांचो आंकडो उणो जाल्ल्यान कॅनडाचे अर्थवेवस्थेचेर व्हड परिणाम जाला. ट्युशन फी, रावपाचो आनी राबितो खर्चा वरवीं वर्साक अब्जांनी डॉलर योगदान दितात. कॅनडियन ब्युरो फॉर इंटरनॅशनल एज्युकेशनाच्या अहवाला प्रमाण आंतरराष्ट्रीय विद्यार्थी कॅनडाचे अर्थवेवस्थेंत वर्साक सुमार 1.34 लाख कोटी रुपया योगदान दितात.
2021 वर्सा कॅनडांत म्हारगाय 0.71% आशिल्ली, जी 2023 वर्सा 6.8% जाली. भारतीय विद्यार्थ्यांक सप्तकांत 24 वरां काम करपाचेर सरकारान बंदी घाल्या. हाका लागून विद्यार्थ्यांक बरी जीण जगप शक्य ना. तशेंच बेरोजगारीत वाड जाल्या. देखून भारतीय विद्यार्थी कॅनडा आतां कॅनडा बदला ऑस्ट्रेलिया, न्यूझीलंड आनी जर्मनींत वचपाक पसंत करतात. 2023 वर्सा 1.22 लाख भारतीय विद्यार्थी ऑस्ट्रेलियांत गेल्ले, जाल्यार 2022 वर्सा एक लाखां परस चड.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
