भांगरभूंय | प्रतिनिधी
नवी दिल्ली, खबरां संस्था: हिंदू-मुसलमान कुटुंबां मदलो ‘उत्पन्न’ फरक नेटान उणो जायत आसा. दोनूय समाजांतल्या घरां मदलो हो फरक ७ वर्सांत ८७% उणो जावन फकत २५० रुपया जाला, जो २०१६ वर्सा म्हयन्याक १,९१७ रुपया आशिल्लो.
पीपल्स रिसर्च ऑन इंडियाज कंझ्युमर इकॉनॉमी (PRICE) ह्या ना- फायदो, ना- लुकसाण तत्वाचेर चलपी संस्थेच्या सर्वेक्षणांत ही आंकडेवारी मुखार आयली. देशांतल्या मुस्लिमांचें वर्सुकी उत्पन्न २८%, हिंदूंचें १९% आनी शीखांचें ५७% वाडलां.
ह्या इकॉनॉमीक थिंक टँकान देशांतल्या १६५ जिल्ह्यांतल्या १,९४४ गांवां मदल्या २,०१,९०० कुटुंबांनी हें नमुना सर्वेक्षण केलां. सात वर्सांनी मुस्लीम कुटुंबांचें वर्सुकी उत्पन्न २.७३ लाख रुपयां वयल्यान २७.७ टक्क्यांनी वाडून ३.४९ लाख रुपया जालां. ह्याच काळांत हिंदूंचें उत्पन्न २.९६ लाख रुपयां वयल्यान १८.८ टक्क्यांनी वाडून ३.५२ लाख रुपया जालां.
‘प्रायस’ प्रमाण, अर्थीक नदरेन दुबळ्या घटकांचें उत्पन्न आदले परस चड जोडप्यांचे तुळेंत वाडलां. कोविडा आदीं देशाच्या उत्पन्नांत सगळ्यांत उण्या २०% लोकांचो वांटा फकत ३% आशिल्लो जो २०२२-२३ त वाडून ६.५% जालो. हे तुळेंत, शीर्ष २०% उत्पन्न गटाचो वांटो ५२% वयल्यान फकत ४५% मेरेन उणो जाला. उच्च वर्गाच्या उत्पन्नाचो वांटो उणो जाल्ल्यान गरीब आनी मध्यमवर्गीयांचें उत्पन्न वाडलें. हाचो फायदो सगळ्या विभागांक जालो.
सरकाराच्यो फुकट धान्य येवजण, किसान सन्मान निधी आनी गृहनिर्माण येवजण्यांनी कांय प्रमाणांत समाजीक- अर्थीक दर उणो करपांत म्हत्वाची भुमिका केल्या. अल्पसंख्याक विशेश म्हळ्यार मुस्लीम समाजाचो अर्थीक नदरेन दुबळ्या वर्गांत आस्पाव जाता. ताका लागून सकयल्या वर्गाच्या तुलनात्मक उन्नतीचो मुस्लीम कुटुंबांक चड फायदो जाला.
धर्मीक आदाराचेर, सर्वेक्षण केल्ल्या सगळ्या हिंदू कुटुंबां मदल्या २१% पदवीधर सांपडले आनी फकत २१% कुटुंबां अशीं सांपडलीं जंय कोणतरी नोकरी करताले.
एससी-एसटी श्रेणींत पदवीधर आशिल्ल्या कुटुंबांचे तुळेंत नोकरी आशिल्लीं कुटुंबां सगळ्यांत चड आसात. एससी-एसटी श्रेणींत अनुक्रम १७% आनी ११% घरां पदवीधरांचीं आसात. जाल्यार, १८% SC आनी १५% ST श्रेणींतल्या कुटुंबां कडेन नोकर्यो आसात.
ओबीसी वर्गांतल्या २०% कुटुंबां मदीं पदवीधर आशिल्ले, मात १८% कुटुंबां मदीं नोकरी करपी लोक आसले. हो फरक सर्वसाधारण वर्गांत सगळ्यांत चड आसा. हातुंतल्या २९% कुटुंबांनी पदवीधर आसात, मात फकत २६% कुटुंबानी नोकरदार आसात.
२०१६ त हिंदूंचें मासीक उत्पन्न २४,६६७ रुपया आशिल्लें. आनी मुस्लिमां खातीर २२,७५० रु. आशिल्लें. २०२३त हिंदूं खातीर २९,३३३ रु. आनी मुस्लिमां खातीर २९०८३ रु. आसलें. देशांतल्या ६० लाख शीख कुटुंबांच्या वर्सुकी उत्पन्नांत ५७.४% वाड जाली, जी सात वर्सांच्या काळांतली सगळ्यांत चड आसा. ती ४.४० लाखां वयल्यान ६.९३ लाखां मेरेन वाडली.
हेर समुदायां खातीर, जातूंत जैन- पारशी आनी हेर ल्हान समुदायांचो आसपाव आसा, तांचें वर्सुकी उत्पन्न ५३.२% वाडून ३.६४ लाख रुपयां वयल्यान ५.५७ लाख जालां. हें समुदाय पयलींच सगळ्यांत गिरेस्त आसा. देशाच्या अर्थीक घडामोडींचो सगळ्यांत चड फायदो तांकां जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
