भांगरभूंय | प्रतिनिधी
भांगरभूंय । प्रतिनिधी
पणजी : गोंयांत पावस सामको ऐन भरांत आयला. आतां मेरेन सांखळी, काणकोण, मडगांव आनी सांगें वाठारांत 40 इंचां परस चड पावसाची नोंद जाल्या. सांखळे सगळ्यांत चड 1090 मिमि (42.91 इंच) पावसाची नोंद जाल्या. सांखळे सयत काणकोणां 1033.2 मिमि, मडगांवां 1037.1 मिमि, सांगें 1054.5 मिमि पावसाची नोंद जाल्या. मजगती हवामान खात्यान 4 जुलय मेरेन येलो एलर्ट जारी केला.
गोंयांत आतां मेरेन सरासरी 939.7 मिमि (36.99 इंच) पावसाची नोंद जाल्या. हें प्रमाण वर्साच्या सरासरी परस 2.8 टक्के चड आसा. फाटल्या 24 वरांत गोंयांत सरासरी 32.8 मिमि पावसाची नोंद जाल्या.
गोंयांत मॉन्सून आयले उपरांत पावसाक नेटान सुरवात जाली. पावस ना असो एकूय दीस वचूंक ना. सकाळीं कांय वरां पावस विसव घेता, मात उपरांत पावसाच्यो दडको सुरू जातात. 15, 16 आनी 18 जूनाक सरासरी पावसाचें प्रमाण 1 इंचा परस उणें आशिल्लें. ना जाल्यार हेर दिसांनी देड इंचा परस चड पावसाची नोंद जाल्या. पावसाक लागून झाडां पडपा सयत रस्त्याचेर उदक भरपाच्यो घडणुको सुरू आसात. हाका लागून उजो पालोवपी दळाक मातूय सुसेग मेळना.
फाटल्या 24 वरांचो विचार केलो जाल्यार सांखळे सगळ्यांत चड 67.2 मिमि (2.64 इंच) पावसाची नोंद जाल्या. वाळपय आनी सांखळे पावसाचें प्रमाण चड आसता. सांगें उपरांत फोंडें 48 मिमि, सांगें 44.4 मिमि पावसाची नोंद जाल्या. मुरगांवां सगळ्यांत उणो म्हणल्यार 14.6 मिमि पावसाची नोंद जाल्या.
इतले मजगतीं हवामान खात्यान 30 जून ते 4 जुलय मेरेन येलो एलर्ट जारी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
