भांगरभूंय | प्रतिनिधी
कोरापूट, खबरां संस्था: ओडिशाच्या कोरापुटांतल्या दोग जाणांक अँथ्रॅक्स ह्या संसर्गजन्य रोगाची लागण जाल्या. ताचेर एसएलएन मेडिकल कॉलेजींत उपचार सुरू आसात. १४ जून दिसा अँथ्रॅक्साक लागून मरण आयिल्ल्या जनावराचे मांस खाल्ल्यान दोग जाणांक हो रोग जाल्ल्याचें सांगतात. तशेंच ह्या गांवांतल्या हेर १० कुटुंबांकय हॉस्पिटलांत दाखल केल्यात अशी म्हायती भलायकी खात्याच्या अधिकार्यांनी दिल्या.
ह्या अधिकार्यान दिल्ले म्हायती प्रमाण कोरापुटांतल्या कुटिंगा गांवांत भलायकी तज्ञांचो पंगड धाडून अँथ्रॅक्साच्या प्रकोपाचो आढावो घेतलो. ह्या गांवांत अँथ्रॅक्स ह्या संसर्गजन्य रोगाचे दुयेंती सांपडल्यात. मजगतीं, अँथ्रॅक्स हो एक गंभीर बॅक्टेरियाचो रोग आसून ताचेर वेळार उपचार केलो ना जाल्यार ताचे गंभीर परिणाम जावंक शकतात.
मजगतीं, अँथ्रॅक्स हो रोग संसर्ग जाल्ल्या जनावराक हात लायल्यारय जावं येता. संसर्ग जाल्ल्या जनावराचें मांस खाल्ल्यानय हो रोग जावं येता. इतलेंच न्हय तर संसर्ग जाल्ल्या जनावराच्या संपर्कांत आयल्या उपरांतय हो रोग जावंक शकता. पूण हो रोग चड करून जनावरां मदीं दिसून येता. अँथ्रॅक्सचीं लक्षणां १ ते ७ दिसांनी दिसतात.
ओडिशाच्या कोरापुटांत दोन जाणांक अँथ्रेक्साचीं लक्षणां दिसून आयले उपरांत प्रशासनाक खबर दिल्या. फुडले कांय दीस भलायकी अधिकारी ह्या दुयेंसा संबंदी गांव आनी भोंवतणच्या वाठारांचेर नदर दवरतले.
अँथ्रेक्साचीं लक्षणां खंयचीं?
अँथ्रेक्साचीं लागण जाल्यार १ ते ७ दिसां भितर लक्षणां दिसतात. ही संसर्ग जाल्यार कांतीचेर फोड वा पुळेर दिसूंक शकतात. तशेंच गळ्याक सुज येवप, खोंकली येवप, जोर येवप वा स्वास घेवपाक त्रास जावप अशेंय जावं येता. हाचेर बेगोबेग उपचार करचे पडटात. सारके उपचार जाले नात जाल्यार दुयेंतीक मरण लेगीत येवंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
