सिंगापूरांतले बायल धर्मगुरूक साडे धा वर्सां बंदखण

भांगरभूंय | प्रतिनिधी

भक्तांक 43 कोटी रुपयांक घाली तोपी, तांचो करताली क्रूर छळ

सिंगापूर, खबरां संस्था ः सिंगापूरांत 54 वर्सां पिरायेची धर्मगुरू वू मे हो हिका साडेधा वर्सां बंदखणीची ख्यास्त फर्मायल्या. न्यायालयान तिका फटोवप आनी आपल्या भक्तांक जखमी करप सयत 5 आरोपांनी गुन्यांवकार थारायली. वु मेई होचेर आपल्या भक्तांचो ब्रेनवाॅश करून आपूण देवी अशें मानपाक सांगपाचो आरोप आसा.
भक्तांनी तिची आज्ञा पाळली ना जाल्यार वु मेई हो तांकां क्रूर ख्यास्त दिताली. ती भक्तांक तिची विश्ठा खावपाक लायताली आनी प्लासांतल्यान दांत काडपाक सांगताली. ती भक्तांचेर कात्रेन हल्लो करताली आनी इमारतीच्या दुसऱ्या माळ्या वयल्यान उडी मारपाक लेगीत सांगताली.

सिंगापूरच्या खबरां चॅनल सीएनएच्या बातमे प्रमाण, वु माय ही आपूण भारतीय धर्मगुरू श्री शक्ति नारायणी अम्मा हिचो भक्त असो दावो करता. श्री शक्ति नारायणी अम्माचे भक्त तिका नारायणी देवीचो पयलो ज्ञात अवतार मानतात. वु मेई हो 2012 वर्सा सावन सिंगापूरांत 30 भक्तांचो पंगड घेवन एक आश्रम चलयता. लोकांचेर विस्वास दवरपा खातीर ती सदांच देवी भशेन साडी न्हेसता आनी मेकअप करता.
वू माय हो हांचो सरळ संबंद श्री शक्ति नारायणी अम्मा कडेन 2012 वर्साच आशिल्लो. ह्याच काळांत ती देव आनी आत्म्यां कडेन उलोवपी देवी म्हूण आपली वळख करपाक लागली. हाचे उपरांत तिणें आपल्या भक्तांक स्वताक देव म्हणपाक सांगलें.
वु मेई होच्या भक्तांनी न्यायालयांत सांगलें, आपूण आपलीं दुयेंसां बरे करपाक आनी आपलें जिवीत सुदारपाक वु मेई हांगा वताले. ह्या वेळार वु मेई लोकां कडेन पयशे मागताली. आपलें ‘वायट कर्म’ निवळ करपा खातीर भारतांतल्या अम्माक पयशे धाडचे पडटात अशें ती सांगताली. अशे तरेन वु मेईन भक्तांक 43 कोटी रुपयांची फटवणूक केली.
ह्या पयशांनी भारतांत गायांची जतनाय घेवप, देवळां आनी शाळा बांदपा खातीर वापरली असो दावो वु हाणें केला. वु हाणें तांकां गरजेचीं वस्तू विकतीं घेवपाक, जेवण रांदपाक, घर निवळ करपाक आनी येरादारी खातीर वाहनांची वेवस्था करपाक लायिल्ल्याचो आरोप 10 भक्तांनी केला.
वुचेर पयलेच खेपे 2020 वर्सा तिच्या भक्तांनी मारपेटाचो आरोप केल्लो, उपरांत ऑक्टोबर 2020 वर्सा तिका अटक केल्ली.