भांगरभूंय | प्रतिनिधी
कर्नाटकाचे मुख्यमंत्री सिद्धरामय्या हांची प्रधानमंत्री नरेंद्र मोदी हांचे कडेन मागणी
कारवार, खबरां संस्था : म्हादय येवजणेंतल्या कळसा भांडुरा कानालाचें उदक वळोवपा खातीर राष्ट्रीय वन्यजीव सल्लागार मंडळ, तशेंच केंद्रीय रान आनी पर्यावरण मंत्रालया कडल्यान ना हरकत दाखलो मेळोवन दिवपा खातीर प्रधानमंत्री नरेंद्र मोदी हांणी लक्ष दिवचें. कर्नाटकाचे मुख्यमंत्री सिद्धरामय्या हांणी शेनवारा रातीं प्रधानमंत्री नरेंद्र मोदी हांकां दिल्लींत मेळून अशी मागणी केल्या.
कर्नाटक हें उण्या प्रमाणांत शिंपणावळ आशिल्लें राज्य आशिल्ल्यान हाका जायते फावट खर दुकळ पडटा. देखून उदका संसाधनांची उदरगत आमच्या राज्या खातीर म्हत्वाची. ताका लागून मेकेदाटू जालशय बांदपा खातीर ९०० कोटी रुपयांच्या डीपीआराक केंद्रीय उदका आयोगान मान्यताय दिवची, अशी मागणीय तांणी केल्या.
म्हादय जल लवादान १४ ऑगस्ट २०१८ दिसा कर्नाटकाक म्हादयचें १३.४२ टीएमसी दिवपाचो निकाल दिला. तांतले ३.९० टीएमसी उदक पिवपा खातीर आसा. कळसा भांडुरा कानालांतल्यान उदक वळोवपाचे येवजणेच्या सुधारीत आराखड्याक (डीपीआर) केंद्रीय जल आयोगान मंजुरी दिल्या. आतां फकत राष्ट्रीय वन्यजीव सल्लागार मंडळ, केंद्रीय पर्यावरण मंत्रालयाचो ना हरकत दाखलो उरला. कित्तूर- कर्नाटकांतल्या लोकांची पिवपाच्या उदकाची गरज भागोवपा खातीर कळसा भांडुरा प्रकल्प येवजण म्हत्वाची. हाका लागून प्रधानमंत्री नरेंद्र मोदी हांणी लक्ष घालचें आनी पर्यवारणीय ना हरकत दाखलो मेळोवन दिवचो, अशी मागणी सिद्दरामय्या हांणी प्रधानमंत्री मोदी हांचे कडेन केल्या.
प्रधानमंत्री मोदी हांचे सयत शेनवारा रातीं वट्ट ४० मिनटां सिद्दरामय्या हांणी ह्या विशयाचेर चर्चा केली. तशेंच राज्यांतले जायते विशय चर्चेक आयले. ह्या वेळार उपमुख्यमंत्री डी के शिवकुमार आनी हेर मंत्री हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
