भांगरभूंय | प्रतिनिधी
सरकाराच्या ह्या निर्णयाचेर विरोधी आमदार तिडकल्यात
पणजी, प्रतिनिधी : मुख्यमंत्री गुरुदक्षिणा येवजणे खाला राज्यांतल्या सगळ्या अनुदानीत शिक्षणीक संस्थांनी ऍक्सिस बँकेंत खातीं उगडचीं, अशे आदेश सरकारान जारी केल्यात. शिक्षण संचालक शैलेश झिंगडे हांणी हे विशींचें परिपत्रक जारी केलें.
मात, सरकाराच्या ह्या निर्णयाचेर विरोधी आमदार तिडकल्यात. राष्ट्रीयीकृत नाशिल्ल्या बँकेंत खातीं उगडपाचें चेंपण सरकार अनुदानीत शिक्षणीक संस्थांचेर कित्याक हाडटा, असो प्रस्न ते विचारतात.
अनुदानीत शिक्षणीक संस्थां कडल्यान शिक्षक आनी कर्मचार्यांक वेळार आनी निर्धारीत वेतन दिना अश्यो कागाळी वाडपाक लागले उपरांत मुख्यमंत्री डॉ. प्रमोद सावंत हांणी २०२३-२४ च्या अर्थसंकल्पीय भाशणांत मुख्यमंत्री गुरुदक्षिणा येवजण जाहीर केली. हे येवजणे खाला अनुदानीत शिक्षणीक संस्थांक ऍक्सिस बँकेंत खातीं उगडपाचे निर्देश दिल्ले. मात, आतां मेरेन जायत्या संस्थांनी ऍक्सिस बँकेंत खातीं उगडूंक ना. ताका लागून शिक्षण संचालकांनी परत परिपत्रक जारी करून सगळ्या सर्व अनुदानीत शिक्षणीक संस्थांना ऍक्सिस बँकेंत खातीं उगडपाचे आदेश जारी केल्यात. राज्यांत सुमार ५७० अनुदानीत शिक्षणीक संस्था आसात, शिक्षण खात्याच्या आदेशा प्रमाण ह्या सगळ्यांक आतां ऍक्सिस बँकेंत खातीं उगडचीं पडटलीं.
हे येवजणे खाला सरकारान फकत अनुदानीत शिक्षणीक संस्थांकूच ऍक्सिस बँकेत खातीं उगडपाचे आदेश दिल्यात. ह्या संस्थांचे शिक्षक आनी हेर कर्मचार्यांक मात हे विशीं कसलेच तरेची जबरदस्ती करूंक ना.
मजगतीं, सरकाराच्या ह्या निर्णयाक विरोधी आमदारांनी खर आक्षेप घेतला. विरोधी पक्ष फुडारी युरी आलेमाव हांणी हाचे वयल्यान सरकाराचेर आरोप केल्यात. राज्य सरकार ह्या निर्णया वरवीं खाजगी बँकांक फाटबळ दिता, सरकारी बँको सोंपोवन उडोवपाचें सरकारान चिंतलां अशी टिका विरोधक करतात. जाल्यार, आमदार कार्लुस फेरेरा हांणी ह्या निर्णयाक न्यायालयांत आव्हान दितलों अशें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.