भांगरभूंय | प्रतिनिधी
दुबावितां आड गुन्यांव नोंद
म्हापशें, प्रतिनिधी ः आसगांवच्या आगरवाडेकार हांचें घर मोडपा खातीर बावन्सरांनी वापरिल्ले इनोव्हा गाडयेर कावलां अड्ड्यांतल्यान हाडिल्ली नंबर प्लेट आनी चेसी नंबर लायिल्ल्याचें उक्तें जालां. हे विशीं गुन्यांव फांट्यान सुभान अहमद किडवाई (रा. कुठ्ठाळे) आनी हेरां आड गुन्यांव दाखल केला.
फाटल्या २२ जुनाक आसगांवां आगरवाडेकार हांचे घर मोडपा खातीर बावन्सरांनी जीए ०९ ए ९९०३ क्रमांकाची गाडी वापरिल्ली. उपरांत ती विशेश चवकशी पंगडान दुबावीत मोहम्मद इम्रान सलमानी (३४, कुठ्ठाळे) हाचे कडल्यान जप्त केल्ली.
गाडयेचे नंबर प्लेटी वयल्यान ही गाडी सुरेश गौडेर (मांगूरहील वास्को) हांची आशिल्ल्याचें कळ्ळें. ते प्रमाण एसआयटीन गौडेर हांची चवकशी केली तेन्ना आपणें आपली गाडी दुबावीर सुभान अहमद किडवाई ह्या कांवलां अड्ड्या वाल्याक विकिल्ली. तशेंच गाडयेचीं कागदपत्रांय वांगडा दिल्ल्याचें तांणी सांगलें.
गौडेर हांणी २०२०त गाडी विकली तेन्ना दुबावीत किडवाई हांच्या कावलां अड्ड्याचेर आनीक एक इनोव्हा गाडी आशिल्ली. दुबावीत किडवाई हांणी ते गाडयेक गौडेर हांचे गाडयेची क्रमांकपट्टी आनी चेसी नंबर लावन ती दुबावीत मोहम्मद सलमानी हाका वापरपाक दिली. उपरांत हीच गाडी आगरवाडेकार हांचें घर मोडपाक वापरली.
दुबावीत किडवाई आनी हेरांनीय दुसरे गाडयेची चेसी आनी नंबर प्लेट जप्त केल्ले गाडयेक लावन, ती वापरून फटयल्ल्या आरोपा खाला गुन्यांव फांट्यान दुबाविता आड गुन्यांव नोंद केला. ह्या प्रकरणांत एसआयटीचे पुलीस निरीक्षक निनाद देऊलकार हांणी कागाळ दिल्ल्यान फुडलो तपास गुन्यांव फांटो करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.