भांगरभूंय | प्रतिनिधी
मुख्यमंत्रीः अखील गोंय ग्रामीण पत्रकार संघाचें उक्तावण
भांगरभूंय । प्रतिनिधी
दिवचलः ग्रामीण वाठारांतल्या पत्रकारांचें गोंयचे पत्रकारितेंत व्हड योगदान आसा. अशे पत्रकार तांच्या मागण्यां पासून पयस उरचे न्हय, हे खातीर सरकार यत्न करतलें. पूण खरो ग्रामी पत्रकार कोण हाची सगळ्यांत आदीं व्याख्या थारावची पडटली. सरकारी येवजण्यां खातीर फक्त पूर्णवेळ ग्रामीण वाठारांत पत्रकारिता करपी पत्रकारूच पात्र थारपाक शकता. वेंचणुकेक तीन म्हयने आसतना पत्रकार म्हूण उत्पन्न जावपी कांय जाण आसतात. तांचेर मिडिया आस्थापनांनी थेट बंदी घालपाची गरज आसा. अशे उत्पन्न जावपी ‘नव्या पत्रकारांक’ लागून खऱ्या प्रामाणीक पत्रकारांचेर अन्याय जाता, अशें मुख्यमंत्री डॉ. प्रमोद सावंत हांणी सांखळे कार्यावळींत उलयतना सांगलें.
गोंयांतल्या ग्रामीण वाठारांत फाटल्या कितल्याश्याच वर्सा सावन काम करपी पत्रकारांचो स्थापन केल्ल्या अखील गोंय ग्रामीण पत्रकार संघाचें उक्तावण मुख्यमंत्री डॉ. सावंत हांचे हस्तुकीं जालें. ह्या वेळार माचयेर वन विकास म्हामंडळाची अध्यक्ष तशेंच आमदार डॉ. देविया राणे, म्हायती आनी तंत्रज्ञान म्हामंडळाचे अध्यक्ष तशेंच आमदार डॉ. चंद्रकांत शेट्ये, फलोत्पादन म्हामंडळाचे अध्यक्ष तशेंच आमदार प्रेमेंद्र शेट, सांखळेची नगराध्यक्ष रश्मी देसाय, म्हायती आनी प्रसिध्दी खात्याचे संचालक दीपक बांदेकार, गूज संघटणेचे प्रतिनिधी संदेश प्रभुदेसाय, पत्रकार संघाचे अध्यक्ष उदय सावंत हाजीर आशिल्ले.
गोंयांत सद्दा येवपी दिसाळ्यांची हेडलायन जरी शारांतल्यान दितात तरी लेगीत पुराय दिसाळें ग्रामीण वाठारांतल्या बातम्यांनी भरिल्लें आसता. ग्रामीण वाठारांतलो पत्रकार आयज लेगीत पत्रकारितेंत आपलें मोलाचें योगदान दिता, अशें मुख्यमंत्र्यान सांगलें.
ग्रामीण पत्रकारितेंत लेगीत पत्रकारांनी दरेके परिस्थिती प्रमाण विचार करून काम करपाची गरज आसा. आपलें मत दिसाळ्यांनी मांडटना तें सदांच थेट आसचें. ते खातीर स्वता दरेका पत्रकारान निबर जावपाक जाय. ज्या वेळार तुमी निबर जावन पत्रकारिता करतले तेन्नाच पत्रकारांचेर लोकांचो विस्वास कायम उरतलो, अशें आमदार डॉ. चंद्रकांत शेट्ये हांणी सांगलें.
पत्रकारिता करतना पत्रकारांनी सदांच सत्य आनी बेधकडपणा आपले लेखणींत दवरचो. अशें केल्यार पत्रकाराचेर चेपण हाडपाची हिंमत कोणाकूच जावची ना, अशें आमदार प्रेमेंद्र शेट हांणी सांगलें.
गोंयांतल्या ग्रामीण वाठारांत काम करपी पत्रकारांचें आयज पत्रकारिते वांगडाच समजीक मळार लेगीत योगदान आसा, अशें आमदार डॉ. देविया राणे हांणी सांगलें.
आयजचो काळ हो डिजिटल आशिल्ल्यान दिसाळीं वाचपाची युवा पिळगेची आवड दिसना. सोशल मिडिया आनी डिजिटल चॅनलां हांचेर युवा पिळगी चड भर दिता. ताका लागून दिसाळ्यांतल्या बातम्यांची गोडी ही मर्यादीत घटका पुरतीच उरल्या. हातूंतल्यान भायर सरचे खातीर पत्रकारांक वेगवेगळे विशय हाताळचे पडटले, अशें पत्रकार संदेश प्रभुदेसाय हांणी सांगलें.
हे कार्यावळींत ज्येश्ठ पत्रकार अजीत पैंगिणकार (काणकोण), संतोष गांवकार (काणकोण), सुनील फातर्फेकार (केपें), प्रेमानंद भेंडे (केपें), अनुराधा मोघे (सालसेत), दिलीप देसाय (दिवचल), मोहन वेरेंकार (फोंडें), नारायण राठवड (बार्देस), आनंद मंगेश नायक (सांगें), प्रकाश तळवणेंकार (पेडणें), दयानंद राणे (मुरगांव), उमेश बाणास्तरकार (तिसवाडी) हांचे मुख्यमंत्र्यां हस्तुकीं सत्कार केलो. कार्यावळीचें सुत्रसंचालन पत्रकार मनोदय फडते आनी नितिक्षा गांवकार हांणी केलें. उदय सावंत हांणी येवकार दिलो आनी प्रास्तावीक केलें. विशांत वझे हांणी पत्रकार संघान मुख्यमंत्र्यांक दिल्ल्या निवेदनाचें वाचन केलें. जाल्यार सचीव बी. डी. मोटे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
