भांगरभूंय | प्रतिनिधी
2 जुलयाक मुख्यमंत्र्यांची भेट
भांगरभूंय । प्रतिनिधी
पणजीः कला अकादमी प्रस्नाचेर कला राखण मांड नांवाची राज्यव्यापी संघटणा स्थापन केल्या. संघटणेचें शिश्टमंडळ मंगळारा 2 जुलयाक मुख्यमंत्री डॉ. प्रमोद सावंत हांची भेट घेवन कला अकादमी विशीं श्वेतपत्रिका काडपाची मागणी करतले, अशें देविदास आमोणकार हांणी सांगलें. शेनवारा पणजे घेतिल्ले पत्रकार परिशदेंत ते उलयताले. ह्या वेळार राजदीप नायक आनी सेसील रॉड्रिग्स हाजीर आशिल्ले.
आमोणकार हांणी सांगलें, गोंयांतल्या कलाकारांक नुतनीकरण केल्ले कला अकादमी विशीं कांय प्रस्न आसात. इतलो खर्च करून कला अकादमी आदले वरी जावंक ना. हे विशीं सरकारान तंत्रीक आनी हेर गजालीं विशीं म्हायती दिवप गरजेचें आसा. हे खातीर आमी श्वतपत्रिका काडपाची मागणी केल्या. हे विशीं कला संस्कृती मंत्री गोविंद गावडे हांणी प्रतिसाद दिवंक नाशिल्ल्यान आनी मुख्यमंत्र्यांक मेळपाचो निर्णय घेतला. आंदोलनाची सुरवात मंगळारा कला अकादमींत नाल्ल फोडून करतले. हें आंदोलन फक्त पणजी पुरते मर्यादीत उरचें ना. गोंयभरांतल्या कलाकारांनी एकठांय येवन कला राखण मांड ही संघटणा स्थापन केल्या. बेगिनूच दरेका म्हालांत समिती नेमतले. हे संघटणेची फुडली बसका मडगांवां जातली. बसकेंत चार्ल्स कुरय्या फावंडेशनाच्या वांगड्या कडल्यान आदले कला अकादमीच्यो तांत्रीक बाजू आनी नुतनीकरणा उपरांतच्यो तांत्रीक गजाली हाची म्हायती घेतले. हे बसकेची तारीख बेगिनूच जाहीर करतले. जे मेरेन कला अकादमी संबंदांत समाधानकारक जाप मेळना ते मेरेन आमचें आंदोलन चालूच उरतलें, अशें आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
