भांगरभूंय | प्रतिनिधी
भावंडांनो,
भावंडांनो,
अदीं- मदीं उटंगाराचो पावस वाऱ्या वादळा सयत गडगडा सयत जोगलां मारीत धुमशेणां काडटा. केन्ना पावस कसो पडत हाचो नेम नासता. तरी हवामान खातें आमकां विसर नासतना बदलत्या हवामानाची म्हायती दीत रावता. तेंचपरी उटंगार पावसाची शक्यताय उक्तावन आमकां शिटकावणी दीत रावता. भावंडांनो, आमी तांचे शिटकावणेक पाळो दिवंक जाय. आमी दिलोना जाल्यार आमचीच जीण विस्कळीत जावंक शकता. आमच्या हलगर्जीपणान आमकां त्रास जावंक शकता. देखून म्हणटां पावसा विशीं ज्यो कितें शिटकावणी तुमच्या कानार पडटल्यो तांकां तुमी उपकार करून पाळो दियात हां.
भावंडांनो, मदीं मदीं पावसाच्यो आकांताच्यो दडको शिंवरतात. वारें येता तें येता, पुणून तें वारें सैमाक पिसडून उडयता. त्या वेळार तुमी घरांतल्यान भायर सरूं नाकात हां. वाऱ्या नेटार झाडां पेडां हुमटतात. न्हंयांक हुंवार येता. उदक धडे वयर सरता. मेकळ्या सुवातांनी फोंडकुलांनी भरून रावता. न्हंय, व्हाळांच्या धडांनी भोंवू नाकात. उदकान त्यो फुगिल्ल्यो आसतात. केन्नाय कोसळून पडटत हाचो नेम नासता. देखून भावंडांनो पावसांत घराभायर भोंवतना पुराय तरेन काळजी घेयात. तुमी वाटे वयल्यान चलतना शिटूक रावात.
आनीक एक म्हत्वाचें. भावंडांनो, आमच्या राज्यांतल्या भलायकी खात्यान सगळ्या वांठारांनी भोंवडी करून पळोवणी केल्या आनी एक म्हत्वाची शिटकावणी आमकां दिल्या. ती म्हळ्यार ‘राज्यांत डेंग्यू, मलेरिया सारकिल्ल्या दुयेंसांचें प्रमाण वाडत आसा. तांचे दुयेंती व्हड प्रमाणांत सांपडटात. तेन्ना तुमी भावंडांनो, ह्या जळारां सावन जावपी डेंग्यू, मलेरिया, चिकून गुनियाचे दुयेंती जावचे न्हय म्हूण काळजी घेयात. हीं जळारां आतां सांचून उरपी उदकांत तांतयां घालतात आनी तातूंतल्यान तीं जळारां जातात. म्हणटकच भावंडांनो, एक काम करात, खंयूय उक्ताडार उदक भरून उरिल्ल्यो कट्ट्यो, टबां, टायर, प्लास्टिकाचीं आयदनां दिसलीं जाल्यार. तातुंतलें उदक पांय मारून रकयात. घरा भोंवतणी नितळसाण राखात. खंयच उदक सांचूंक दिवं नाकात आनी त्या जळारां सावन तुमची जतनाय घेयात. तीं दुयेंसां खूब घातक आसात.
पावसांत भिजून आंग ओलें दवरूं नाकात. पावसाच्या दिसांनी तळ्यांनी, न्हंयानी पेंवपाक वचप म्हुणल्यार संकटां ओडून घेवप. ते खातीर कोणेंच पेंवपाक वचप ना. हे विशीं दुसऱ्याकूय सादूर करात, कित्याक तर उदक कितलें खोल आसतना आनी भितरल्यान ताचो नेट कसो आसता हें आमकां वयर रावून कळना. भावंडांनो, सांगतलीं न्हय तुमी? हांवें सांगलां ते प्रमाण तुमच्या जीवाची जतनाय घेतलीं न्हय? शाब्बास! येयात तर आंगणांत.- उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
