भांगरभूंय | प्रतिनिधी
फोंडें, प्रतिनिधी ः पार-उसगांवां खुरसा कडेन शेनवारा सकाळीं साडेसातांक बोलेरो जीप आनी मोटारी मदीं अपघात जाल्ल्यान 8 जाण जखमी जाले. 5 जाणांक उपचारा खातीर जीएमसींत दाखल केल्यात. ह्या वाठारांत फाटल्या 10 दिसांत 2 वेगवेगळ्या अपघातांत 2 जाणांक मरण आयलें आनी शेनवारा जाल्ल्या अपघातांत 8 जाण जखमी जाले.
मेळिल्ले म्हायती प्रमाण, जीए 12- टी- 0085 क्रमांकाचे जीपींतल्यान एके बायलेक उपचारा खातीर जीएमसींत व्हरताले. तकुळे सावन पणजे वटेन वचपी जीपीन खुरसाकडे मुखारल्यान येवपी केए- 25- एमए – 3637 क्रमांकाचे मोटारींक धपको दिलो. ड्रायव्हर मोटारींत आडकलो. ताका फोंडें उजो पालोवपी दळाच्या जवानांनी भायर काडलो. अपघातांत जखमी जाल्ल्या 8 जाणांक फोंडेंच्या उपजिल्लो हॉस्पिटलांत दाखल केले. उपरांत 5 जाणांक जीएमसींत धाडले. फोंडेंचे हवालदार सज्योत फडते हांणी पंचनामो केलो.
जॉकी फर्नांडीस (58, कुळें), मारिया फर्नांडीस (63, कुळें), जीप ड्रायव्हर जमासाब मुजावर (36, कुळें), मोटार ड्रायव्हर अश्पाक गडगज (30, हुबळी) आनी अनंत पतंग (35, हुबळी) हांकां पयलीं उपचारा खातीर उपजिल्लो हॉस्पिटलांत दाखल केले उपरांत जीएमसींत धाडले. सुनील उनरकार (35, हुबळी), शिवाजी हळर्णपूर (30, हुबळी) आनी सचिन अपई (30, हुबळी) हांचेर उपजिल्लो हॉस्पिटलांत उपचार केल्यात.
मजगतीं, खुरसा सावन फकत शंबर मिटर अंतराचेर आशिल्ले नेस्ले कंपनी मुखार शुक्रारा रातीं एके म्हशीक स्कुटरीन धपको दिलो. हांतूत मरड- धारबांदोडेंचो स्कुटर चलोवपी सदानंद गावडे किरकोळ जखमी जालो. खांडेपार पुल ते खुरसा मेरेन ह्या शंबर मीटर अंतराचेर आशिल्ल्या रस्त्यार फाटल्या 10 दिसांत 3 अपघात जाल्यात. दोन अपघातांत दोग जाणांक मरण आयलें जाल्यार शेनवारा 8 जाण जखमी जाले. वाठारांत अपघातांचो आंकडो वाडत आशिल्ल्यान थळाव्या लोकांनी हुस्को उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
