हलालाक टक्कर दिवपाक हिंदू जनजागृती समितीचें ॐ प्रमाणपत्र

भांगरभूंय | प्रतिनिधी

पणजी, प्रतिनिधी : मुस्लिमांच्या हलाल प्रमाणपत्राक टक्कर दिवपा खातीर हिंदू जनजागृती समितीन हिंदूंक ‘ॐ’ प्रमाणपत्र दिवपाक सुरवात केलां. गोरवांची चरबी वापरून केल्ली मिठाय देवळांत प्रसाद म्हूण दितात. देव दर्शनांक वचपी भक्तांक शुद्ध प्रसाद मेळचो म्हूण देवळाच्या सरभोंवतणी आशिल्ल्या हिंदू दुकानदारांक ‘ॐ’ प्रमाणपत्र फुकट वाटपांक चालू केलां, अशें तेलंगणाचे हिंदुत्ववादी आमदार टी राज सिंह हांणी सांगलें.
ॐ प्रमाणपत्रांची घोशणा करपा खातीर हिंदू जनजागृती समितीन पणजे पत्रकार परिशद घेतिल्ली. टी राज सिंह सयत, सर्वोच्च न्यायालयाचे आदोवगाद विष्णू शंकर जैन, हिंदू जनजागृती समितीचे राष्ट्रीय म्हणयारे रमेश शिंदे आनी गोमन्तक मंदीर महासंघाचे सचिव जयेश थळी हजर आशिल्ले.
देशभरांत पोरणीं देवळां आसात, पुण हांगा जो प्रसाद देवांक दितात तो केन्नाच शुद्ध आसना. सोशल मिडायाचेर पळोवपाक मेळटा की कांय विक्रेते फुलांचेर थुकून तीं विकतात तशेंच गोरवांची चरबी वापरून मावा, पेढे हे सारकिल्ली मिठाय तयार करून ती विकतात आनी आमी हिंदू ती देवांक अर्पण करतात, असो दावो राज सिंह हांणी केलो.
देवळांत सुरक्षा आनी पवित्रताय राखपा खातीर ॐ प्रमाणपत्र आमी अंमलात हाडलां. सगळ्या हिंदू विक्रेकारांक आमी हें प्रमाणपत्र फुकट दितले. हलाल म्हणटात तें पयलीं मांसा पासत सुरू जाल्लें आनी आतां सगळ्यो वस्तु हलाल आसतात. हलाल वस्तु विकत घेतल्यार तो सगळो पयसो आतंकवाद्यांक वता, असोय आरोप राज सिंह हांणी केलो.
आमी कायदेशीर प्रक्रिया करूनच आनी एफएसएसआय दिल्ल्या मुल्यांकनांचो आस्पाव करून हे ॐ प्रमाणपत्र दितले. हे प्रमाण पत्र दिवपी हिंदू धर्माचार्य आसतले. आमच्या शास्त्रांत शुद्धतेचें महत्व आसा तें हे मिठायेंत आसा काय ना हाची पडताळणी केले उपरांतच आमी तें प्रमाणपत्र दितले. तें घेतले उपरांत हलाल वस्तू विकचे नात अशी सय आमी दुकानदारा कडल्यान घेतले. कायदो आनी संविधनाक अनुसरून आमी फुडें वतात, अशी म्हायती रमेश शिंदे हांणी दिली.
हलाल पद्दत ही प्रक्रिया हॉटेलातल्यान सुरू जाल्ली आनी आतां ती फाय स्टार हॉटेल, इमारती, उदक आनी डायपरा मेरेन पावल्या. स्वातंत्र मेळले उपरांत भारतांक 4 युएस ट्रिलयन अर्थवेवस्था जावपा खातीर 75 वर्सा लागली. जाल्यार 2013 सालांत सुरू जाल्ले हलाल प्रमाणपत्राची उलाढाल फक्त धा वर्सां भितर पुराय संवसारभर 2.1 युएस ट्रीलयन जाल्या आनी ही वाड एक व्हडली हुस्क्याची गजाल आसा, अशेंय शिंदे हांणी सांगलें.