भांगरभूंय | प्रतिनिधी
नवी दिल्ली, खबरां संस्थाः वेगवेगळ्या प्रकाराचीं जनावरां घरांत पोसपाक लोकांक आवडटा. सुणीं, माजर, पोपट, पारवे हीं जनावरां आनी सुकणीं. सुण्यांक घराचे राखणदार म्हणून वळखतात आनी ते आपल्या धनया कडेन निश्ठावान आसतात. देखून जायत्या जाणांक घरांत सुणो पोसपाक आवडटा. ताचे उपरांत माजर हें मुखेल घरगुती जनावर. माजर जाती भितर दोन माजर जाती आसात, जीं वेगवेगळी शिकार करपा खातीर वळखतात. पूण आतां रस्टी स्पॉटेड आनी ब्लॅक फुटेड ह्यो माजरांच्यो दोन जाती विलुप्त जावपाचे वाटेर आसात.
घरगुती माजर वा रान माजर आसूं शिकार करपाक तीं हुशार. पूण हांतूत रस्टी स्पॉटेड आनी दुर्मीळ ब्लॅक फुटेड ह्या संवसारांतल्या दोन सगळ्यांत ल्हान माजरांच्यो जाती वेगळ्यो आसात.
आफ्रिकन रानवटी सुणे शिकार करपाक संवसारांत पयल्या क्रमांकाचेर आसात. जाल्यार ही शिकारी माजरा दुसऱ्या क्रमांकाचेर आसात. हुंदीर आनी ल्हान ल्हान सुकणीं हो ह्या माजरांचो आहार. हीं माजरां आकारान ल्हान आसलीं तरी आपल्या वजना परस व्हड सोंश्याचीय शिकार करतात. माजराच्यो दोनूय जाती निशाचर आसतात. झाडाचेर बसून खंयचीय हालचाल एका खिणाक धरपाक ती कुशळ आसतात. ओलसाणीच्या पानगळींच्या रानांनी तीं रावतात.
रस्टी स्पॉटेड माजराची नदर मनशा परस स पटीन बरी आसता. जाल्यार ब्लॅक फुटेड माजर चाळीस वेगवेगळ्या प्रकाराचीं जनावरां खाता. 1.4 मीटर म्हळ्यार 4 फुटां परस चड उंच उडी मारून तीं सुकण्यांची शिकार करपाक शकतात. माजराच्यो ह्यो दोनूय जाती आशिया खंडातल्या भारत, नेपाळ आनी श्रीलंकेच्या कांय वाठारांनी सांपडटात. भारतांतल्या ताडोबा आनी अस्तंत घांटात हीं माजरां मेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
