भांगरभूंय | प्रतिनिधी
सद्याचें यूग हें सोशल मिडियाचें यूग आसा. ह्या युगांत सोशल मिडियाचेर अॅक्टिव्ह रावन आपूण कितलो सोशल आसा हें दाखोवन दिवपाची चडाओड लागल्या. तातूंत तरणाटो वर्ग जाल्यार सोशल मिडियाच्या आहारीच गेला. सोशल मिडियाचेर आपले फॅन फॉलोअर्स कशे वाडटले? आपल्या पोस्टांक चडांत चड लायक आनी शेअर कशे मेळटले हाचे कडेन तरणाट्यांचें लक्ष आसता. पूण कांय वेळा हेच चड फॅन फॉलोअर्स आशिल्ले अकावंट सायबर गुन्यांवकारांक आकर्शीत करतात आनी हांकां धोको दितात.
सायबर गुन्यांवकार जांचे चड फॅन फॉलोअर्स आसात अशा तरणाट्यांक स्टार्टअप कंपनी आपल्या प्रोडक्टाच्यो जायराती करपा खातीर संपर्क करतात. तातूंत ह्या सायबर गुन्यांवकारांचे लक्ष तरणाट्या चलयांचेर चड आसता. सुंदर आनी चड फॅन फॉलोअर्स आशिल्ल्या चलयांक जाळांत ओडपा खातीर सायबर गुन्यांवकार आपूण व्हड कंपनींतल्यान उलयतां आनी ह्या चलयांचे फेसबूक आनी इंस्टाग्रामा वेले रिल्स आनी व्हिडियो पळोवन संपर्क केल्ल्याचें सांगतात. चलयांचो व्हिडियो कंपनीक आवडलो. तुमकां आमच्या कंपनीच्या प्रोडक्टा खातीर जायरात करपा खातीर वेंचून काडिल्ल्याचें सांगून आनीक व्हिडियो आनी रिल्स धाडपाक सांगतात.
चडशे फावटी असो संपर्क ईमेला वरवीं करतात. चलयोय आपूण मॉडेल जाल्यो असो एक प्रकारचो गैरसमज करून घेतात आनी तांणी सांगिल्लें प्रमाण व्हिडियो धाडटात आनी हांगाच फटवतात. व्हिडियो धाडले उपरांत कांय दिसांनी परतून त्या चलयांक मेल येता. हो मेल तांचोच मॉर्फ केल्लो व्हिडियो आसता. तो व्हिडियो मॉर्फ करून अश्लील तयार केल्लो आसता. हो व्हिडियो धाडून चलयांक ब्लॅकमेल करतात. हे अश्लील व्हिडियो व्हायरल करपाची धमकी दिवन चलयां कडेन पयशांची मागणी करतात. जांचे कडेन पयशे आसात त्यो चलयो पयशे दिवन स्वताची सुटका करून घेतात. पूण जांकां पयशे दिवप शक्य ना त्यो चलयो बदनामीचे भिरांतीन स्वताची जीण सोंपयतात.
आयज मेरेन देशांत खूबश्यो चलयो ह्या सायबर गुन्यांवकारांच्या कारस्थानाच्यो बळी थारल्यात. विशेश म्हणल्यार हे ब्लॅकमेलर सायबर गुन्यांवकार अदृश्य आशिल्ल्यान सायबर क्रायमा कडेन कागाळ करून लेगीत तांचो तपास लागतलोच अशें ना. अश्यो खूबश्यो केसी पुलिसांच्या सायबर क्रायम सेला कडेन आसून लेगीत गुन्यांवकार मेकळे भोंवतात. अशा सायबर गुन्यांवकारांचो तपास लावप पुलिसां खातीर तकलीफोड जाल्या. पुलिसांचो सायबर सेल अशा हांयसाक बळी पडूं नाकात अशें आव्हान करीत आसता. तरिपूण खूबश्यो चलयो ह्या हांयसाक बळी पडटात.
हालींच्या दिसांनी तर हें प्रमाण खूब वाडलां आनी ताका लागून सोशल मिडियाचेर वावुरतना खूब सादूर रावप गरजेचें आसा. सायबर गुन्यांवकारांची ही टोळी आपली सोशल मिडियांत आपूण घालत आशिल्ल्या पोस्टा वेल्यान आपली मानसीकताय वळखून वेवस्थीतपणान जाळें उडयतात आनी फटयतात. ताका लागून सोशल मिडियाचेर पोस्ट घालतना जतनाय घेवची. सोशल मिडियाचेर वळखीच्याच लोकांक फॉलो करचे. अनवळखी लोकांचे फ्रेंड रिक्वेस्ट स्विकारचे न्हय. अनवळखी लोकांचे मेल आनी फोन कॉलाक जाप दिवची न्हय. स्वताच्यो कुटुंबीक आनी वैयक्तीक गजाली सोशल मिडियाचेर घालच्यो न्हय. सोशल मिडियाचेर वावुरतना जर सतर्क रावले ना जाल्यार सायबर गुन्यांवकारांचे हे अदृश्य चेरे घेरपाक टपूनच बसल्यात हाची जाण सोशल मिडिया वापरपी सगल्या तरणाट्यांनी दवरची.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
