भांगरभूंय | प्रतिनिधी
म्हजी खुशी कुशीक दवरून, देवाची खुशी पळेवन जियेवंक जाय. धार्मीक जिणेचो अर्थ जाणा जावनच आमी असले जिणेंत भितर सरतात. हेंच हे जिणेचें खाशेलेपण.
क्रिस्तो एका चेडवाच्या मोगान आसलो. लग्न संस्कार जोडच्या वेळार आवय- बापायन ताचो निर्णय चुकीचो म्हूण आडमेळीं घातल्यो. आवय- बापायचें आयकून तो दुसऱ्या चेडवा लागीं लग्न जालो. सात म्हयने जावंचे आदीं ताची बायल आपले आवयगेर वचून रावली.
राॅयस्टनाक आपली मोटारसायकल वेगान धांवडावपाची संवय जाल्ली. येरादारीच्या नेमांची तो बेपर्वा करतालो. जायतीं जणां ताका समजायतालीं: “तुजें चिंतप सारकें ना, तुजो निर्णय चुकीचो, हे भशेन ताका शिटकायतालीं. “म्हजो निर्णय म्हजे खातीर” अशें तो बडायेन सांगतालो. एका दिसा येरादारी पुलिसान ताका सांपडायलो. भासाभास करुंक लागलो. पुलिसाच्या आंगार हात केलो. बंदखणिंत कश्टवलो.
जिणेंत कसलेय निर्णय घेवप तितलेंशें सोंपें जायना. तरूय आसताना आमी जगूंक जाय हें मनांत धरून आमी निर्णय घेतात. आमी घेतलले निर्णय मात दुसऱ्यांक बरे दिसतात अशें न्हय. बरें दिसल्यार घेतलल्या निर्णयाक येवकार मेळटा. निर्णय मानवलो ना जाल्यार निर्णयाक येवकार सोडूच निर्णय घेवप्याकूय आमच्या शब्दकोशांत सुवात आसना. दुसऱ्यांक बरें दिसूंक जाय, वा दुसऱ्यांनी आमकां बरें म्हणूंक जाय, म्हूण आमी निर्णय घेवप, हातूंत कितलें सत आसा हें सांगूंक कठीण.
जिणेंतले निर्णय म्हणटाना, जायत्यो बाजू आमी पळेवंक जाय. आमचे जिणेतले निर्णय कोणें घेवंचे? आमीच आमचे जिणेचे निर्णय घेवंचे? हय आनी ना! जिणेंत निर्णय घेताना आमची चिंतपाची तांक तशेंच निर्णय घेवंक आमी फावो तितलीं परिपक्व आसात काय? हाचेर विचार जावंक जाय. आमी ल्हान आसताना, आमचे सगळे निर्णय आमचीं आवय-बापूय घेतालीं. आमी कशें वागचें, कितें शिकचें आनी हेर सगळें आवय- बापायच्या निर्णयाचेर अवलंबून आसतालें. पूण आमी व्हड जातच, म्हळ्यारूच आमच्या मनाची तांक वाडटच, आमचे निर्णय आमी घेतल्यार आमकांच बरें.
आमी समाजांत वावुरतात म्हणटच म्हाका जाय ते तरेन हांव वागतलों म्हळें जाल्यार जायना. वयर दिल्ल्या घडितांतलो राॅयस्टन, येरादारीचे नेम मोडून आपणाक जाय तसो वागलो. ताचो परिणाम ताका भोगचो पडलो. एक विद्यार्थी कॉलेजींत प्रवेस करता तेन्ना वा आमी कचेरींत वावुरतात तेन्ना, सगळे नेम मानून घेवनूच भितर सरतात. आमकां ते नेम आवडटात अशें न्हय. पूण, आमचे निर्णय फाटीं दवरून, दुसऱ्यांचे निर्णय आमी आमचे करून घेतात. हातूंतल्यान आमकां कायंच वायट घडना.धार्मीक जिणेंत भितर सरल्यारूय तशेंच वागचें पडटा. म्हजी खुशी कुशीक दवरून, देवाची खुशी पळेवन जियेवंक जाय. धार्मीक जिणेचो अर्थ जाणा जावनच आमी असले जिणेंत भितर सरतात. हेंच हे जिणेचें खाशेलेपण.
दुसरे वटेन कांय जण, आमचेर दबाव घालून, तांचे निर्णय आमी स्विकारुंक जाय म्हण हट्ट धरतात. असलें धरण आमकां चडशें कुटुंबांत, समाजांत आनी राजकी मळांचेर दिश्टी पडटा. सुर्वेक दिल्लें पयलें घडीत पळेवंया. क्रिस्तो, आपूण मोगान आसलल्या चेडवा लागीं लग्न जावंक सोदतालो. आवय-बापायचें आयकून ताणें निर्णय बदल्लो. शेवटाक परिणाम उरफाटो जालो. आपूण जावन क्रिस्तो निर्णय घेवपाचो. वायट परिणाम जालो जाल्यार आपणाकूच दोश दितलो आसलो. आमचीं तरणाटीं जम्यां- निर्णयांक लागून “You are traditional. Old fashioned ” असल्या बिल्ल्यांक लागून वायट निर्णयाचीं तीं गुलामां जाल्यांत. राजकी मनीस, आपले लिपलले हेतू साध्य करुंक घेतलले निर्णय वेव्हारांत घालूंक, आमचो वापर करतात.असली परिस्थिती पळेवंक आमी आमचे दोळे उक्ते दवरप गरजेचें.
आमचे जिणेंतले निर्णय आमीच कित्याक घेवंचे? दुसऱ्यांनी आमचे निर्णय घेतले जाल्यार, निर्णया वरवीं उत्पन जाल्ल्या वायट परिणामांक आमी दुसऱ्यांक जिणभर शिरापतलीं. मसलतदार पसून दुसऱ्यांचे निर्णय आपूण घेना. आमी घेतलले निर्णय आमचे जातले जाल्यार आमकां आमचीच नीज वळख जाय. आमच्यो असकतायो आनी बळ आमी जाणांत जाल्यार आमी सरळ रितीन आंचे विचार व्यक्त करुंक फाटीं सरचीं नांत. दुसऱ्यांक बळी पडचीं नांत. आमकां कितें जाय हें आमी जाणांत म्हुणटच समाजांत खयंच्याय मळांचेर भितर सरुंक आमकां भें दिसचें नां. आमकां मेळ्ळल्या असक्तायांचेर जैत व्हरुंक मसलतदारांचो आदार घेतल्यार बरो.
—जॉन एम्. आल्फोंसो, कार्मेलीत,
(लोलयें) 7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
