भांगरभूंय | प्रतिनिधी
पुलिसांनी गुन्यांव नोंद करून तपास केलो सुरू
पणजी: काणकोण पयलो वर्ग न्यायालयाचे न्यायाधीश स्मिता सैल हांकां जिवेशी मारपाची धमकी दिवपी पत्र आयलां. हे विशीं काणकोण पुलिसांनी गुन्यांव दाखल करून तपास सुरू केला.
मेळिल्ले म्हायती प्रमाण ह्या प्रकरणांत काणकोण पयलो वर्ग न्यायालयाचे न्यायाधीश स्मिता सैल हांणी कागाळ दाखल केल्या. ते प्रमाण 24 जून दिसा सकाळीं 9 वरांचेर न्यायालयांत एक पत्र आयिल्लें. तातूंत न्या. सैल हांकां जिवेशी मारपाची धमकी दिल्ली. तशेंच संबंदीत पत्र दिवानबाग काणकोण हांगासरल्या विरेंद्र काणकोणकार हांच्या नांवान आयिल्ल्याचें म्हणलां. ताका लागून त्या दिसा न्यायाधिशांनी सुनावणी आपल्या कॅबिनांतूच घेतिल्ल्याची म्हायती मुखार आयल्या.
मजगतीं, हाची दखल घेवन पुलीस निरिक्षक हरीश रावत देसाय हांणी संबंदीत दुबावीत विरेंद्र काणकोणकार हाचे आड भारतीय दंड संहितेच्या कलम 506 (ii) खाला गुन्यांव दाखल करून तपास सुरू केला.
ह्याच वेळार वयले सुवातेर त्या नांवाचो मनीस नाशिल्ल्याची म्हायती मुखार आयली. हाची दखल घेवन पुलीस दुबाविताचो सोद घेतात. ते खातीर पुलीस वाठारांतले सीसीटीव्ही कॅमेरा तशेंच हेर म्हायतीची चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
