भांगरभूंय | प्रतिनिधी
पणजी: थायलंडांत नोकरी दिवपाच्या नांवा खाला दक्षीण गोंयांतल्या दोगां तरणाट्यांक कंबोडियांत व्हरून सायबर गुन्यांवांत आडकून दवरिल्ले. ह्या प्रकरणांत गुन्यांव फांट्यान मुंबय सावन मोहम्मद काझी हाका अटक केल्या. अटक केल्लो दुबावीत काझी हाका पणजेंतल्या पयलो वर्ग न्यायालयान सात दिसांची पुलीस कोठी दिल्या.
ह्या प्रकरणांत दक्षीण गोंयांतल्या केपें आनी कुडचडें वाठारांतल्या दोगां तरणाट्यांनी गोंय पुलिसांच्या सायबर विभागांत कागाळ दाखल केल्या. ही कागाळ फटवणुके विशीं आशिल्ल्यान गुन्यांव फांट्यांत वर्ग करून गुन्यांव दाखल केल्लो. त्या दोगांकूय वाठारांतले एके बायलेन थायलंडांत कॅसिनोंत म्हयन्याक एक लाख रुपयांचें हांयस दाखोवन मुंबयंतल्या एका एजंटा वतीन एप्रील म्हयन्यांत थायलंडांत धाडिल्ले.
थंय कॅसिनोंत नोकरी दिवपा बदला त्या दोगांकूय पयली बंदिस्त दवरले. उपरांत थंयच्या एजंटांनी त्या दोगांकूय हेर भारतीय तरणाट्यां सयत बेकायदो रितीन थायलंडाची शीम हुमून कंबोडिया देशांत व्हेले. थंय त्या दोगांक बनावट कॉल सेंटरांत काम करपाक भाग पाडलें. थंय तांकां भारतांल्या नागरिकांक कॉल करपाक सांगून विवीध प्रकाराचीं हांयसां दाखयलीं. तशेंच त्या दोगांकूय भारतीय नागरिकांच्या बँक खात्याची म्हायती घेवपाक भाग पाडलें. अशे पद्दतीन भारतीय नागरिकाची फटवणूक जाताली. हो प्रकार भारतीय गुप्तचर यंत्रणेक मेळ्ळे उपरांत तांणी कंबोडियांतल्या भारतीय दुतावासाक सतर्क करून सायबर घोटाळ्याची म्हायती दिवन हेर भारतीया सयत त्या दोगांची सुटका केली.
गोंयांत आयले उपरांत त्या दोगांनीय कागाळ दाखल केली. हाची दखल घेवन गुन्यांव फांट्यान दक्षीण गोंयांतले एके बायले सयत मुंबयंतल्या तिगां एजंटा आड भारतीय दंड संहितेच्या 420 आनी 120 बी खाला गुन्यांव दाखल करून तपास सुरू केलो.
ह्याच वेळार मुखेल सुत्रधार मुंबयंत आशिल्ल्याची म्हायती मेळ्ळी. ते प्रमाण पुलीस अधिक्षक राहूल गुप्ता आनी उपअधिक्षक राजेश कुमार हांच्या मार्गदर्शना खाला निरिक्षक दत्तराम रावत हांच्या फुडारपणा खाला हवालदार दिनेश पिकुळकार, कॉ. विनायक सावंत, सैमुल्ला मकंदर आनी हेर पंगड मुंबयंत 27 वेर वचून दुबावीत मोहम्मद काझी हाका ताब्यांत घेतलो. उपरांत बिरेस्तारा गोंयांत हाडून अटक केली. अटक केल्लो दुबावीत काझी हाका पुलीस कोठये खातीर पणजेंतल्या पयलो वर्ग न्यायालयांत हजर करतकूच न्यायालयान ताका सात दिसांची पुलीस कोठी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
