भांगरभूंय | प्रतिनिधी
उल्हास तुयेंकार: दर वर्सा दोन कोटींचें लुकसाण; 22 दिसांचे पयशे भरून दितले पास
मडगांव: सरकारी कर्मचाऱ्यांक सबसिडी दिवन दितात ते पास येवजणेक लागून वर्साक दोन कोटींचें लुकसाण कदंब म्हामंडळाक जाता. सरकारी कर्मचाऱ्यांक ट्रॅव्हल अलावन्स मेळत आशिल्ल्यान कदंबा कडल्यान पासा वेली सबसिडी बंद करून 22 दिसांचे पयशे भरून घेवन पास दितले अशी म्हायती कदंब म्हामंडळाचे अध्यक्ष आनी आमदार उल्हास तुयेंकार हांणी दिली.
सरकारी कर्मचाऱ्यां खातीरचे पास येवजणे विशीं उलयतना कदंब म्हामंडळाचे अध्यक्ष उल्हास तुयेंकार हांणी सांगलें, तेन्नाचे मुख्यमंत्री मानेहर पर्रीकार हांणी कदंब बशींत प्रवाशांची संख्या वाडोवपा खातीर पास येवजण सुरू केल्ली. हाचो फायदो सरकारी कर्मचाऱ्यांक लेगीत जातालो. सरकारी कर्मचाऱ्यांक 40 टक्के सबसिडी मेळटाली आनी तांकां येरादारी भत्तोय मेळटालो. ताका लागून सरकारी कर्मचाऱ्यां खातीरची पासाची येवजण बंद केल्ली. आतां तांकां कामाक बेगीन येवपाचे आसता तांकां रांगेंत रावप पडचें न्हय हे खातीर तांकां पास दितले.
सरकारी कर्मचाऱ्यांक 22 दिसांचे प्रवासाचे पयशे फारीक करून पास दितले. हाका लागून तांकां प्रवासाची कसलीच अडचण येवची ना. सद्या 1 जुलय सावन सरकारी कर्मचाऱ्यांक तात्पुरती पास सेवा करून दितले. उपरांत ज्या एजन्सी कडेन काम आसा, तांचे कडल्यान फुडल्या 15 दिसांत कायमस्वरुपी पास तांकां दितले अशें आमदार उल्हास तुयेंकार हांणी सांगलें.
कदंबाचे बशींतल्यान शाळेच्या भुरग्यांक व्हरता आसतना कोणाचीच अडचण जावची न्हय हे खातीर चड भुरग्यांक बशींत बसयिल्ले. पूण एका आपवावुरपी संस्थेन बशींत चडून मोबायलांत शुटींग काडलें आनी आरटीओक धाडून दिलें. उपरांत आरटीओन कदंबाक दंड दिलो आनी तो भरचो पडलो. भुरग्यांच्या पालकांची आनी विद्यार्थ्यांची गैरसोय जावची न्हय हाची जतनाय कदंब म्हामंडळ घेत आसतना असो प्रकार जालो. त्या भुरग्यांक तांचे शाळेंत पावयले, तांकां कोणाकूच सकयल देंवयलें ना. पूण हाचे मुखार ज्या भुरग्यां कडेन पास आसतले आनी तांकी प्रमाण भुरग्यांची संख्या राखतले अशें उल्हास तुयेंकार हांणी म्हणलें.
म्हजी बस येवजण सुरूच उरतली
कदंब बस म्हामंडळान सुरू करीत सावन म्हजी बस येवजणेक दक्षीण गोंयांतल्यान बरो प्रतिसाद मेळ्ळो. आतां मेरेन सुमार 60 बशी मडगांव ते काणकोण, मडगांव ते सांवड्डें-कुडचडें ह्या मार्गार सुरू आसात. बस धनयांक प्रतिकिलोमिटर 34 रुपया प्रमाण पयशे दर सप्तकाक दितात. तांचे 26 रुपया प्रमाण पयशे जमा जाल्यार वयले 8 रुपया प्रतिकिमि कदंब म्हामंडळा कडल्यान दितात. ही येवजण बरे तरेन सुरू आसून ती बंद करचे नात अशें उल्हास तुयेंकार हांणी सांगलें.
फुडल्या तीन म्हयन्यांत 50
डिझल, 96 इलेक्ट्रीक बशी
शाळेंतल्या भुरग्यांक हाड व्हर करपा खातीर कदंब म्हामंडळाक 150 बशींची गरज आसा. 15 वर्सां जाल्ल्यो बशी कावलांत काडपाच्या आदेशाक लागून 55 बशी बंद जाल्यात. सरकारान 50 डिझल बशी घेवपाक मंजुरी दिल्या. त्यो दोन म्हयन्यां भितर मेळटल्यो. तातूंतल्यान आंतरराज्य बशी सुरू करतले. तशेंच तीन म्हयन्यांत 96 इलेक्ट्रीक बशी उपलब्ध जातल्यो. कोणाचीच अडचण जावची न्हय हे खातीर पोरण्यो बशी दुरुस्त करून मार्गार सोडटले अशेंय आमदार उल्हास तुयेंकार हांणी म्हणलें.
आसगांव प्रकरणांत राज्य सरकारान रोखडोच निर्णय घेवन तपास गुन्यांव फांट्यां कडेन दिला. एसआयटी स्थापन करून कारवाय लेगीत सुरू जाल्या. राज्या भायल्यान येवन गोंयकारांची घरां मोडपाचें काम करून शांतताय आनी कायदो सुवेवस्था इबाडपाचो यत्न खपोवन घेवचे नात. दोशींचेर खर कारवाय करतले अशी म्हायती आमदार उल्हास तुयेंकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
