भांगरभूंय | प्रतिनिधी
मुंबय, खबरां संस्था: ‘बाहुबली’ फिल्मांत देवसेनेची भुमिका केल्ली अभिनेत्री अनुष्का शेट्टी हिका हांसपाचें एक दुर्मीळ दुयेंस जालां. ह्या दुयेंसांत एकदां ती हांसपाक लागली काय १५ ते २० मिनटां थांबचना.
अनुष्कान दिल्ले मुलाखतींत ही गजाल उक्ती जाल्या. वैजकी नदरेन ह्या दुयेंसाक ‘स्यूडोबुलबार इफेक्ट’ म्हण्टात अशें तिणें सांगलें.
ह्या दुयेंसांत हांसपाक लागतकच तिका स्वताचेर नियंत्रण दवरूंक मेळना. ताका लागून जायते फावट शुटींग आडावची पडटा.
अनुष्कान सांगलें, म्हाका हांसपाचें दुयेंस आसा. तुमकां आयकून अजाप जातलें कीं हांसप ही एक समस्या आसूं येता काय म्हणून. पूण म्हजे खातीर ती आसा. हांव हांसपाक लागल्यार १५ मिनटां स्वताक आडावंक शकना. विनोदी दृश्य पळयतना वा शुटींग करतना हांव अक्षरशा हांसत जमनीर लोळटां. अशें जाता तेन्ना शुटींग आडावची पडटा.
स्यूडोबुलबारचो प्रभाव कितें?
हो एक न्युरोलॉजिकल डिसऑर्डर आसा. जातूंत मनशाक हांसप, रडप आनी हेर भावनांचेर नियंत्रण दवरपाक कठीण जाता. ह्या भावनांचो दुयेतींचे सदचे स्थितीचो कांयच संबंद ना.
हाचेर उपचार कितें?
तज्ञांच्या मतान जेन्ना अशें जाता तेन्ना लांब स्वास घेवप आनी आपलें मन हेर विशयांचेर केंद्रीत करपाक मजत जावं येता. तशें खांदे, मान आनी छातयेच्या आशिकुशीच्या स्नायूंक विसव दिवपाक उपेगी थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
