भांगरभूंय | प्रतिनिधी
नवी दिल्ली, खबरां संस्था ः हालींसराक प्लास्टीकाचो वापर जायत्या तरांनी जाता. प्लास्टीक हो दिसपट्टे जिणेचो म्हत्वाचो भाग जाला. सध्या लोक चड करून उदक पियेवपा खातीर प्लास्टीकाच्या बाटल्यांचो उपेग करतात, पूण तातूंतल्यान उदक पियेल्यार भलायकेच्यो जायत्यो गंभीर समस्या निर्माण जावंक शकतात. गोडेंमूत सारकिल्ले दुयेंस जावं येता.
अमेरिकन डायबिटीज असोसिएशनान केल्ल्या अभ्यासांत, प्लास्टीकांत वापरिल्ल्या बीपीए वरवीं इन्सुलिनाची संवेदनशीलताय उणी जाता, जाका लागून टायप 2 गोडेंमूत जावपाचो धोको वाडटा अशें दिसून आयलां. अन्न आनी पेय पदार्थांच्या पॅकेजींगांत बीपीएचो खूब उपेग जाता. ताका लागून रगतांतली साकर वाडूंक शकता, जो टायप 2 गोडेंमूत जावपाचो एक मुखेल धोको आसा.
अशे तरेन गोडेंमुताचो धोको उणो करुं येता
सध्या अन्नधान्याच्या कंटेनरांत 5 मिग्रॅ मेरेन बीपीए आसल्यार एफडीए सुरक्षीत मानता. पूण नव्या अभ्यासांत हें प्रमाण धोक्याचें आशिल्ल्याचे दिसून आयलां. अभ्यासा प्रमाण तें प्रमाण शंबर पटींनी चड आसा, संशोधकांनी अन्न आनी पेयांच्या संपर्कांत येवपी उत्पादनांत बीपीएचेर बंदी घालपाची मागणी केल्या. स्टेनलेस स्टील वा कंवचेच्यो बाटली तशेंच बीपीए मुक्त कंटेनर वापरून बीपीएचो एक्सपोजर उणो केल्यार गोडेंमूत जावपाचो धोको उणो जावं येता असो निश्कर्श ह्या अभ्यासांत काडला.
बीपीए म्हणल्यार कितें?
बीपीए वा बिस्फेनॉल-ए (Bisphenol-A) हें एक उद्देगीक रसायन जें प्लास्टीक तयार करपा खातीर वापरतात. अन्न, भुरग्यांच्यो बाटल्यो आनी प्लास्टीकच्या उदकाच्यो बाटली ह्या सारक्या जायत्या वेपारी उत्पादनांत ताचो उपेग करतात.
प्लास्टीकाच्या कंटेनरांत वा बाटलेंत सुरक्षीत बीपीए पातळी वळखुपाक जाय जाल्यार लक्षांत दवरपाचे कांय आंकडे आसात. 1, 2, 3 आनी 5 क्रमांकाचीं उत्पादनां सगळ्यांत सुरक्षीत प्लास्टीक मानतात. तेच बरोबर रिसायकल क्रमांक 3, 6 वा 7 क्रमांकाचें प्लास्टीक शक्य तितलें टाळप बरें. ह्या प्रकारच्या प्लास्टीकाचें रिसायकल करप भलायकेक धोक्याचें थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
