भांगरभूंय | प्रतिनिधी
वाहन चालकांचे सुरक्षे खातीर घाले बॅरिकेड्स
फोंडें: कुट्टे रस्त्याचें रुंदीकरण सुरू आशिल्ले सुवातेर बुधवारा दनपारां पालसण कोसळ्ळें. आनीक पालसणां कोसळपाचो घात आशिल्ल्यान पुलिसांनी वाहन चालकांचे सुरक्षे खातीर वाठारांत बॅरिकेड्स घाल्यात. तशेंच वाठारांत पुलीस तैनात केल्यात.
रस्त्याचें रुंदीकरण करतना कंत्राटदारान थळाव्या लोकांचे विनंतीक दाद दिवंक नाशिल्ली. थळाव्या लोकांनी पावसाच्या दिसांनी पालसण कोसळपाची भिरांत काम सुरू आसतना कंत्राटदारा कडेन आनी बांदकाम खात्याच्या अभियंत्या कडेन केल्ली. पूण बुधवारा सकाळीं पडिल्ल्या पावसाक लागून दनपारां पालसण कोसळ्ळें. कांय झाडां लेगीत पडपाच्या मार्गार आसात.
घडणुकेची म्हायती मेळटकच पुलिसांनी धांव घेवन वाठारांत बॅरिकेड्स घाल्यात. ताका लागून कुट्टी ते बेतोडें बायपास रस्त्या वेली येरादारी सुरळीत सुरू जाली. फुडल्या कांय दिसांनी आनीक पालसणां कोसळपाचो घात निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
