भांगरभूंय | प्रतिनिधी
आसगांव आगरवाडेकार घर प्रकरण
पणजी: आसगांवां आगरवाडेकार कुटुंबाचें मोडिल्लें घर बांदून दिवपा सयत तांचें घर उबे आशिल्ले जमनीचो मालकी हक्क लेगीत तांकां मेळोवन दिवपाची मागणी आमदार तशेंच गोवा फॉरवर्डाचे अध्यक्ष विजय सरदेसाय हांणी बुधवारा पणजे पक्ष कचेरेंत घेतिल्ले पत्रकार परिशदेंत उलयतना दिली.
आसगांवां आगरवाडेकार कुटुंबाचे घर बुलडोझर घालून बेकायदो रितीन मोडप आनी बापूय-पुताचें अपहरण करप ह्यो घडणुको गोंयांत सोबनात. दिल्लींतले भुंयमाफिया दिल्लींत अशे तरेचीं कर्तुबां करून दादागिरी करीत आसतात. तसोच प्रकार तांणी आतां गोंयांत सुरू केला, आनी ह्या प्रकरणांत गोंयची सरकारी वेवस्था आनी पुलिसां कडल्यान तांकां पालव मेळटा ही दुखेस्त गजाल आसा अशें सरदेसाय हांणी म्हणलें.
आसगांव प्रकरण गुन्यांव फांट्या कडेन दिवपाचो निर्णय मुख्यमंत्री डॉ. प्रमोद सावंत हांणी घेतला. पूण गुन्यांव फांट्याचे चवकशेंतल्यान फक्त एक आरोपी मुखार येतलो. हेर दोशी मात ह्या प्रकरणांतल्यान सुटूंक शकतात. ताका लागून ह्या प्रकरणांत जे दोशी आसात त्या सगल्यांचो सोद घेवन तांचेर खर कारवाय करप गरजेची आसा अशें सरदेसाय हांणी म्हणलें.
बुलडोझर घालून घर मोडीत आसतना घडणूक थळार जे पुलीस आशिल्ले तांचीय ह्या प्रकरणांत चवकशी जावप आनी दोशी थारिल्ल्या पुलिसांक तत्काळ सेवेंतल्यान निलंबीत करप गरजेचें आसा अशें तांणी म्हणलें.
येता त्या विधानसभा अधिवेशना मेरेन सरकारान आगरवाडेकार कुटुंबाक मोडिल्लें घर बांदून दिवचें. घर आशिल्ले जमनीचो मालकी हक्क तांकां दिवचो. तशेंच ह्या कुटुंबाक पुलीस संरक्षण लेगीत दिवचें अश्योय मागण्यो आमदार सरदेसाय हांणी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
