भांगरभूंय | प्रतिनिधी
स म्हयन्यांत दावो करिना जाल्यार गाडयांची पावणी
मडगांव, प्रतिनिधी : येरादारी पुलिसांनी मडगांव, फातोड्ड्यां वाठारांतल्या ३१ बेवारशी गाडयांची नोंद केल्या. ह्या गाडयांचेर स म्हयन्यांनी कोणेंच हक्क गाजोवंक ना जाल्यार तांची पावणी करतले. हे विशीं दक्षीण गोंय जिल्लोधिकार्यांनी नोटीस जारी केल्या.
दक्षीण गोंय जिल्लोधिकारी अश्विन चंद्रू ए. (आयएएस) हांणी नोटीस जारी करून बेवारशी गाडयांचेर कारवाय करप सुरू केलां. दक्षीण गोंय येरादारी पुलीस उपअधीक्षक प्रबोध शिरवयकार हांणी मडगांव आनी फातोड्ड्यां वाठारांत बर्याच काळा सावन बंद अवस्थेंत आनी बेवारशी स्थितींत आशिल्ल्या गाडयांची वळेरी जिल्लोधिकारी कार्यालयाक सादर केल्या.
ह्या बेवारशी गाडयांक लागून जळारां जावन साथीचें दुयेंस पातळपाचो धोको आसा. ताका लागून सामान्य लोकांचे भलायकेक धोको निर्माण जावपाक शकता. रस्त्यां कुशीक आशिल्ल्या बेवारशी गाडयांक लागून येरादारीक त्रास सोंसचे पडटात. कांय कडेन पार्किंग सुवातोय आडयल्यात. ह्या वाहनांक लागून भौशीक सुरक्षिततायेक धोको निर्माण जावपाक शकता. हे फाटभूंयेर जर ह्या बेवारशी गाडयांचो हक्क सांगिना जाल्यार तांचो पावणी करतले. ह्या गाडयांचेर कोणायचो हक्क वा दावो आसल्यार तांणी स म्हयन्यां भितर कागदी पुराव्या सयत उपजिल्लोधिकारी कार्यालया कडेन संपर्क करचो. स म्हयन्यां उपरांत कसलेच तरेचो दावो मान्य करचे ना. ह्यो गाडयो राज्य सरकाराच्या नावान जप्त करतले आनी कायद्या प्रमाण भौशीक पावणीा वरवीं निकालांत काडटले. येरादारी विभागान नोंद केल्ल्या ३१ गाडयांची वळेरी उपजिल्होधिकारी कार्यालया कडेन उपलब्ध आशिल्ल्याचेंय सांगलें.
हॉस्पिसिओ लागसारा ऑटो, टॅक्सी, मोटारसायकल पायलट स्टॅण्ड
दक्षीण गोंय जिल्लो हॉस्पिटल (हॉस्पिसिओ) हांगा म्हामार्गा पसून ४० मिटर अंतराचेर टी ज्कशनावेल्या मदर मारिया क्लारा रोडा वटेन गाडयांचो तळ निश्चीत केला. हॉस्पिटलाचे राखणे वणटी वटेन रिक्षा स्टॅण्ड, टॅक्सी स्टॅण्ड आनी मोटारसायकल पायलट स्टॅण्ड उबारतले. निमाणो गाडयांचो तळ हो दुयेंती, सोयरीं आनी हेर हॉस्पिटलांत येवप्यां खातीर आसतलो.
दक्षीण गोंय जिल्होधिकारी अश्विन चंद्रू ए. (आयएएस ) हांणी अधिसुचवणी जारी केल्या. भौशीक बांदकाम विभागाच्या कार्यकारी अभियंत्यांक ह्या गाडयांच्या तळांच्या रस्त्याचें सपाटीकरण करुन तखटे उबारपाक सांगल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
