भांगरभूंय | प्रतिनिधी
मडगांव, प्रतिनिधी : दक्षीण गोंय जिल्लोधिकारी कार्यालयांत मंगळारा जिल्लोधिकारी, आमदार विजय सरदेसाय हांचे वांगडा जाल्ले बसकेंत रस्त्या कुशीक उब्या केल्ल्या वाहनांचो मुद्दो चर्चेक आयिल्लो. ते प्रमाण बुधवारा सकाळीं मडगांव येरादारी पुलिसांनी फातोड्ड्यां दामबाब सर्कल ते आर्ले रस्त्यार पार्क केल्ल्या वाहनांचेर कारवाय करपाची मोहीम सुरु केल्या.
दक्षीण गोंय जिल्होधिकारी कार्यालयांत मंगळारा जिल्लोधिकारी अश्विन चंद्रू ए (आयएएस), आमदार विजय सरदेसाय, मडगांव पालिका, येरादारी पुलीस हाचे सयत हेर सगळ्या विभागांच्या प्रतिनिधीं सयत बसका जाल्ली. हे बसकेंत आमदार विजय सरदेसाय हांणी रस्त्या शेजराक पार्क करपी वाहनांक लागून येरादारीक आडखळ निर्माण जाता. हाचो थळाव्यांकूय त्रास जाता अश्यो कागाळी येता अशें सांगलें. ते प्रमाण मडगांव येरादारी पुलिसां कडल्यान ह्या वाहनांचेर कारवाय करपाचे निर्देश दिल्ले. बुधवारा सकाळीं मडगांव येरादारी पुलीस निरीक्षक संजय दळवी हांचे सयत सहकार्यांनी ङ्गातोड्ड्यां वाठारांतल्या रस्त्या शेजरच्या वाहनांक क्लॅम्प लावप आनी हेर कारवाय करपाक सुरवात केल्या.
येरादारी पुलीस निरीक्षक दळवी हांणी, जिल्होधिकारी कार्यालयांत जाल्ले बसकेंत रस्त्यार उब्यो केल्ल्या वाहनांचो मुद्दो आयिल्लो. ते प्रमाण आतां फातोड्ड्यां दामबाब सर्कल ते आर्ले हांगा नवो बांदिल्ल्या रस्त्या शेजरा उब्यो केल्ल्या वाहनांक कॅम्पींग करून आनी फोटो काडून गाडयांच्या धनयांक नोटीस धाडटले. उपरांत अशे तरेन वाहनां रस्त्या कुशीक लायल्यार तांचेर आनीक खर कारवाय करतले. पयलीं ५०० रुपया तालांव, दुसरे फावट देड हजारांचो दंड भरचो पडटलो. ज्या वाहनांचे फोटो काडल्यात तांच्या धनयांक नोटीस धाडटले. पयले फावट नोटीस धाडटले आनी मागीर फुडली कारवाय करतले. ही मोहीम फुडेंय चालूच उरतली. कुंकळ्ळ्यां, मडगांव, फातोड्ड्यां आनी मायणा कुडतर्यां अशीं चार पुलीस स्टेशनां मडगाव येरादारी पुलीस केंद्राच्या वाठारांत येतात. ते प्रमाण तांकी परस कांय कर्मचारी उणे आसतले तरीय वेवस्थापनांतल्यान कारवाय चालूच उरतली अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
