बेताळभाटी, कळंगुटे दर्यादेगेर पर्यटन पुलीस आनी जीवरक्षकांनी दोन कांसवांक वाटायले
भांगरभूंय | प्रतिनिधी
मडगांव, प्रतिनिधी : दक्षीण गोंयच्या बेताळभाटी दर्यादेगेर तशेंच उत्तर गोंयचे कळंगुटे दर्यादेगेर पर्यटक पुलिसांनी जिवरक्षकांच्या सहकार्यान दोन ऑलिव्ह रिडले कासवांक वाटायले. उपरांत तांकां रान विभागाचे सुवादीन केले.
मेळिल्ले म्हायती प्रमाण, बुधवारा सकाळीं सुमार साडेणव वरांचेर दक्षीण गोंयच्या बेताळभाटी दर्यादेगेर ऑलिव्ह रिडले कांसव दर्यांत तुटून पडिल्ल्या नुस्तें मारीच्या जाळ्यांत आडकून दर्यादेगेर आयिल्लो पर्यटक पुलीस आनी जीव रक्षकांक दिसलो. पर्यटक पुलीस कॉन्स्टेबल चेतन गावडे हांचे सयत जिवरक्षक लक्ष्मीकांत गावडे, रोशिन पाटील हांणी जाळ्यांत आडकल्ल्या कांसवाची सुटका केली.
तशेंच सकाळीं सुमार साडेधा वरांचेर उत्तर गोंयचे कळंगुटे दर्यादेगेर गस्त घालपी पर्यटक पुलीस कॉन्स्टेबल अभिजीत कळंगुटकार हांकां जखमी अवस्थेंत ऑलिव्ह रिडले कांसव दर्यादेगेर सांठून उरिल्ल्या उदकांत तळमळटना दिसलो. तांणी जीवरक्षक कृष्णा सिद्देकार हांच्या सहकार्यान कांसवाक उदका भायर काडून ताका उपचारा खातीर आनी फुडले कारवाये खातीर वन विभागाच्या अधिकार्यांचे सुवादीन केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
